Taldyqorǵandaǵy órt: áleýmettik jelide jarylys týraly aqparat tarady
ASTANA. KAZINFORM – Taldyqorǵanda jeke turǵyn úı men sharýashylyq qurylysynyń shatyry órtendi. Áleýmettik jelilerde oqıǵa kezinde jarylys bolǵany týraly aqparat taraǵan.
Jetisý oblysynyń Tótenshe jaǵdaılar departamentiniń málimetinshe, órt týraly habarlama saǵat 21:08-de túsken.
– Oqıǵa ornyna Tótenshe jaǵdaılar departamentiniń qyzmetkerleri jedel jetip, órtti sóndirýge kiristi, – dep habarlady vedomstvodan.
Órt turǵyn úı shatyrynyń 60 sharshy metrin jáne sharýashylyq qurylysynyń 50 sharshy metrin sharpyǵan.
Tilsiz jaý saǵat 21:50-de tolyq sóndirildi. Zardap shekkender týraly aqparat joq.
– Órtti sóndirýge jeke quramnan 17 adam jáne 5 tehnıka jumyldyryldy. Órttiń shyǵý sebebi anyqtalyp jatyr, – dep málimdedi TJD.
Vedomstvonyń resmı habarlamasynda jarylys emes, órt bolǵany kórsetilgen. Al áleýmettik jelilerde taraǵan jarylys týraly aqparattyń mán-jaıy men qanshalyqty ras ekeni ázirge belgisiz.
Aıta keteıik, Semeıde avtojýýdaǵy órtten zardap shekkenderdiń biri jansaqtaý bóliminde jatyr.
