Taldyqorǵandaǵy kottedj qalashyǵy bir táýlikten beri jýyq jaryqsyz otyr
ASTANA. KAZINFORM – Taldyqorǵandaǵy «Bereke» kottedj qalashyǵynda elektr energııasynyń úzilýi týraly aqparat áleýmettik jelilerde tarady. Turǵyndardyń aıtýynsha, bir táýlikke jýyq ýaqyttan beri elektr jelisindegi kerneý qalypqa kelmeı tur, dep habarlaıdy Kazinform tilshisi.
Jergilikti turǵyndardyń sózinshe, elektr qýaty ara-tura óship qalady. Al jelidegi kerneýdiń tómen bolǵany sonsha, turmystyq tehnıkany qosqan kezde jaryq tolyq sónip qalady. Uzaqqa sozylǵan úzilister saldarynan tońazytqyshtardaǵy azyq-túlik erı bastaǵan.
Turǵyndar másele boıynsha túrli qyzmetke júgingenimen, aqaýdy jedel joıý múmkin bolmaǵanyn aıtty.
Jaǵdaıǵa Taldyqorǵan qalasy ákimdiginiń qurylys bólimi túsinikteme berdi.
– Instagram áleýmettik jelisindegi jarııalanymdy qaraý nátıjesinde elektr energııasynyń óshýine kabeldiń zaqymdanýy sebep bolǵany anyqtaldy. Jaqyn arada kabel jelisiniń zaqymdalǵan bóligi aýystyrylady. Qajetti jumystar júrgizilgennen keıin elektrmen jabdyqtaý qalpyna keltiriledi, – dep habarlady vedomstvodan.
Osylaısha, mamandar elektr qýatynyń úzilýine kabel jelisiniń zaqymdanýy sebep bolǵanyn málimdedi. Turǵyndar jóndeý jumystarynyń aıaqtalyp, turaqty elektrmen jabdyqtaýdyń qalpyna kelýin kútip otyr.
Buǵan deıin 14 tamyzdaǵy tehnologııalyq aqaýdan zardap shekken Qazaqstan óńirlerindegi tutynýshylardy elektrmen jabdyqtaý tolyq qalpyna keltirilgeni habarlanǵan.
