Taldyqorǵandaǵy kópqabatty turǵyn úıdiń káriz júıesi bitelip, jórtóle sasyq sýǵa toldy
ASTANA. KAZINFORM — Taldyqorǵan qalasyndaǵy Qulager shaǵyn aýdanynda ornalasqan kópqabatty úıdiń turǵyndary káriz júıesinde jıi qaıtalanatyn apat týraly habarlady. Kezekti aqaý saldarynan jertóle las sýǵa tolyp, úıge taraǵan ótkir ıis qolqany alǵan.
Turǵyndardyń aıtýynsha, mundaı jaǵdaı ár apta saıyn qaıtalanady. Az ýaqyttyń ishinde turǵyn úıdi 8-9 ret sý basqan.
— Biz túnde úıge qonýǵa qorqatyn boldyq. Kez kelgen sátte sý basý qaýipi bar. Odan eshkim saqtandyrylmaǵan, — deıdi turǵyndar.
Erekshe alańdaýshylyq týdyratyn másele — qarjylyq júkteme. Turǵyndardyń aıtýynsha, olar apat saldaryn joıý úshin biraz shyǵynǵa batady. Baspana ıeleri káriz sýyn sorǵyzý qyzmetine ózderi tóleıdi.
— Bir kólik shamamen 10 myń teńge turady. Keıde birneshe kólik shaqyrýǵa týra keledi, tipti on reıske deıin jetken jaǵdaılar boldy. Barlyq shyǵyn turǵyndarǵa teńdeı bólinedi, — deıdi olar.
Qala turǵyndarynyń aıtýynsha, shaqyrylǵan mamandar, santehnıkter máseleniń mán-jaıyn anyqtap, tehnıkalyq sebepterin birneshe ret atap ótken. Mamandar mundaǵy ınjenerlik júıe 16 qabatty úıdiń júktemesine sáıkes kelmeıtinin aıtqan.
Turǵyndar jertóleni sý basqan sát pen oqıǵa ornynda jumys istep jatqan jumysshylardyń áreketinen beınejazba jarııalady.
Úıge qyzmet kórsetetin «Aıala» PIK máseleniń jıi qaıtalanatynyn rastady.
Olar apattyń saldaryn joıý úshin túrli amaldar qarastyrǵan, alaıda másele úzdiksiz qaıtalanyp otyr.
PIK jumysshylary qubyrlardyń bitelý sebepteriniń biri káriz júıesin paıdalaný erejeleriniń buzylýynan bolýy múmkin dep sanaıdy.
— Turǵyndar ylǵaldy maılyqtar men gıgıenalyq quraldardy tastaıdy. Osy kópqabatty turǵyn úıdiń basqa kireberisinde mundaı máseleler týyndamaǵan, — dep túsindirdi PIK ókili Aıdana Baıdónenova.
Sonymen qatar jumysshylar apatty jaǵdaılardy joıý kezinde jertólede uzaq ýaqyt bolýyna baılanysty aýyr jumys jaǵdaılaryna tap bolyp, ózderin nashar sezingenin atap ótti.
Taldyqorǵan qalalyq qurylys bólimi basshysynyń orynbasary Talǵat Maratulynyń aıtýynsha, qazirgi ýaqytta káriz júıesindegi apatty joıý jumystary júrgizilip jatyr.
— Káriz júıesindegi zaqymdy joıý maqsatynda apattyq qyzmetter jertólede jınalǵan sarqyndy sýlardy soryp shyǵaryp jatyr. Tekserý barysynda apatty jaǵdaı káriz júıesine qatty turmystyq qaldyqtar men qoqystyń tastalýynan týyndaǵany anyqtaldy, — dedi ol.
Qazirgi ýaqytta jertóleni tazalaý jáne qurǵatý jumystary júrgizilip jatyr.
Sondaı-aq ákimdik ókili turǵyndardy ınjenerlik jelilerdi paıdalaný erejelerin saqtaýǵa jáne kárizge qatty turmystyq qaldyqtardy tastamaýǵa shaqyrdy.
Turǵyndar jaǵdaıdyń kommýnaldyq qyzmetter men qurylysshylardyń qatysýymen keshendi túrde rettelýine úmit artady. Olardyń aıtýynsha, jıi qaıtalanatyn apattar tek turmystyq qolaısyzdyq týǵyzyp qana qoımaı, turǵyndar úshin sanıtarlyq qaýip-qater de týdyrady.
Eske sala keteıik, ıýuǵan deıin Oral qalasynda kópqabatty úılerdiń káriz júıesi nelikten bitelip qalatyny anyqtalǵan bolatyn.
