Taldyqorǵandaǵy «Qyzyl Tas» saıajaıynyń turǵyndary jol men sýdyń sapasyna shaǵymdandy

TALDYQORǴAN. KAZINFORM — Taldyqorǵandaǵy «Qyzyl Tas» saıajaı aımaǵynyń turǵyndary ınfraqurylymnyń jaǵdaıyna narazylyq bildirdi.

Saıajaı turǵyndarynyń aıtýynsha, negizgi qatynaıtyn joldardyń sapasy syn kótermeıdi:  joldar oıyq-oıyq, kólikter batpaqqa jıi batady, al kúz ben kóktem mezgilinde aýmaq túgeldeı batpaqqa aınalady.

Turǵyndar shaǵymdanǵan taǵy bir másele — sýdyń sapasy. Jergilikti turǵyndar krannan aǵatyn sý ishýge kelmeıtinin aıtty. Buryn merdigerler qajetti jumystardy júrgizemiz dep ýáde bergenimen, keıbir nysandar aıaqtalmaı qalǵan.

Taldyqorǵan ákimdiginiń málimetine sáıkes, bıyl «Qyzyl Tas» saıajaı aımaǵynda birneshe ınfraqurylymdyq joba júzege asyrylyp jatyr. Atap aıtqanda, kóshelerdi jaryqtandyrý jumystary jalǵasyp jatyr — bıyl 17 kóshege jaryq ornatylady jáne barlyq jumystar jyldyń sońyna deıin aıaqtalady dep josparlanǵan.

Іshetin sýmen qamtamasyz etý máselesine kelsek, 2024 jyly 24 shaqyrym sý qubyry tartylǵan. Degenmen, ákimdik túsindirgendeı, keıbir turǵyndar ortalyq sý júıesine qosylmaǵan. Bul máseleni sheshý úshin bılik turǵyndardy ortalyq jelige qosylýǵa shaqyryp otyr.

Sonymen qatar, bıyl tórt kóshege asfalt tóseý josparlanǵan, olardyń jalpy uzyndyǵy 2,8 km. Úsh kóshedegi jumystar tolyq aıaqtalǵan (2 km). «Ortalyq» kóshesiniń 800 metrine jóndeý jumystary qarasha aıynda aıaqtalýy tıis.

Taldyqorǵan ákimdigi júzege asyrylyp jatqan barlyq jobalar erekshe baqylaýda ekenin atap ótti.

Esterińizge salsaq, buǵan deıin Jetisý oblysynda turǵyndar qant zaýyty janyndaǵy jaǵymsyz ıis shyǵatyn qaldyqtarǵa shaǵymdanǵan bolatyn.

Eske sala keteıik, Taldyqorǵan qalasy boıynsha 200 azamat merzimdi áskerı qyzmetke shaqyrylatynyn jazǵan edik.