Taldyqorǵandaǵy beıimdeý ortalyǵynda 7 jasar balanyń denesinen útiktiń izi anyqtalǵan
TALDYQORǴAN. KAZINFORM – Jetisý oblystyq kámeletke tolmaǵandardy beıimdeý ortalyǵynda 2017 jylǵy balanyń denesine útik basylǵany týraly quzyrly organǵa shaǵym túsip, polıtseıler tergeýdi bastady.
Polıanınder otbasynyń qos perzentin ortalyqqa 18 maýsym kúni Taldyqorǵan qalalyq bilim bólimi qyzmetkerleri aparǵan. Analary qaıtys bolǵannan keıin 14 tamyzda olardy týystary alyp qaıtqan. Ákesi sol kezde 7 jastaǵy balasynyń sol ıyǵynan útik izin baıqaǵandaryn aıtady.
«Oqıǵa tústen keıin tynyshtyq ýaqytynda bolǵanǵa uqsaıdy. Roman uıyqtamaı qoıǵan bolýy kerek, janyndaǵy bólmeden úlken qyzym daýysyn estipti. Sodan tárbıeshi ashýlanyp, osylaı jazalaǵan. Bul – jazataıym oqıǵa emes. Kelinshegim uzaq aýyrdy, sodan balalarymyz sol ortalyqqa tústi. Jaqynda jubaıym qaıtys bolyp ketti, endi balalardy ájesi ekeýmiz qaraımyz», - deıdi Roman Polıanın.
Aıtýynsha, qazir jetkinshektiń densaýlyǵy qalypty. Kúıgen teri jazylyp qalǵan. Al, kúdikke ilingen tárbıeshi osy jaǵdaıdan keıin óz erkimen jumystan ketken. Beıimdeý ortalyǵynyń basshysy bul jazataıym oqıǵa kenin aıtady.
«Qasaqana jasalǵan dúnıe emes. Balalardyń oınaıtyn bólmesindegi ústelderdiń jan jaǵyna lenta jabystyryp, sonyń syrtynan útikpen qyzdyrǵan, qyzdyrmasa ol ustamaıdy. Tárbıeshi útikti ustap ketip bara jatqan kezde bir bala basyna jamylǵy jamylyp jatqanyn kóredi. Tunshyǵyp qala ma dep kirgen. Sol kezde artqy jaǵyndaǵy bala turyp qalǵanda, ıaǵnı abaısyzda sondaı jaǵdaı bolǵan», - dedi Jetisý oblystyq kámeletke tolmaǵandardy beıimdeý ortalyǵynyń dırektory Erlan Sansyzbaev.
Alaıda, polıtsııa atalǵan derekke qatysty tergeý jumystaryn bastap ketti.
«Qazirgi ýaqytta bul fakt boıynsha qylmystyq is qozǵaldy jáne tergeý bastaldy. Ortalyq qyzmetkerlerinen túsiniktemeler alyndy. Mekeme basshylyǵy balanyń terisi kúıgenin jazataıym oqıǵa dep málimdeıdi. Alaıda, aıyptaýlardyń aýyrlyǵyn eskere otyryp, polıtsııa departamenti qosymsha saraptamalardy, sonyń ishinde sot-medıtsınalyq saraptamany taǵaıyndady», - dedi Jetisý oblystyq polıtsııa departamentiniń resmı ókili Janar Halyqova.
