Taldyqorǵanda jol apatynan bir adam qaza taýyp, úsh adam jaraqat aldy
ASTANA. KAZINFORM — Taldyqorǵanda eki kólik soqtyǵysyp, jol apaty boldy. Qaıǵyly oqıǵa týraly aqparat áleýmettik jelilerde tarady. Jol apaty qaladaǵy aınalma jolda bolǵany beligili body. Bul týraly Kazinform agenttiginiń tilshisi jazdy.
Polıtsııanyń málimetinshe, jol-kólik oqıǵasyna baılanysty qylmystyq is qozǵaldy.
— Jol apatynan bir adam qaza tapty. Taǵy úsh adam medıtsınalyq mekemege jetkizildi, — dep habarlady polıtsııa.
Qazirgi ýaqytta polıtsııa qyzmetkerleri jol apatynyń barlyq mán-jaıyn anyqtap jatyr.
Polıtsııa júrgizýshilerdi jol qozǵalysy erejelerin qatań saqtaýǵa, manevr jasaý jáne qıylystardan ótý kezinde barynsha muqııat bolýǵa, qarsy baǵyttaǵy kólikke jol berýge jáne jyldamdyqty qaýipsiz deńgeıde tańdaýǵa shaqyrdy.
Buǵan deıin Pavlodar oblysynda bolǵan jol apatynan bir bala qaza taýyp, úsh bala men er adam jáne áıel aýrýhanaǵa jatqyzylǵany habarlanǵan bolatyn.
