Taldyqorǵanda joǵalyp ketken balanyń denesi Qaratal ózeninen tabyldy
ASTANA.KAZINFORM - Buǵan deıin Taldyqorǵanda joǵalyp ketti dep habarlanǵan 6 jasar balany izdeý jumystary aıaqtaldy.
Polıtsııanyń málimetinshe, bala 25 mamyrda saǵat 19:30 shamasynda úıinen shyǵyp ketip, qaıtyp oralmaǵan. 102 arnasyna saǵat 19:50-de onyń joǵalǵany týraly habarlama kelip túsken.
Qońyraýdan keıin Vostochnyı shaǵyn aýdanynda dereý aýqymdy izdeý operatsııasy bastaldy. Operatsııaǵa polıtsııa qyzmetkerleri, tótenshe jaǵdaı bólimsheleri, kınologııalyq top jáne eriktiler qatysty.
Іzdeý toptary aýlalardy, bos jerlerdi, aınalany jáne Qaratal ózeniniń jaǵasyn qarap shyqty. Іzdeý aýmaǵyn keńeıtý úshin beınekamera ornatylǵan dron paıdalanyldy.
Іzdeý jumystary túni boıy jalǵasty.
26 mamyrda, saǵat 05:00 shamasynda, izdeý kezinde Qaratal ózeninen kámeletke tolmaǵan balanyń denesi tabyldy.
Aldyn ala málimet boıynsha, eshqandaı qylmys belgileri joq. Qazirgi ýaqytta polıtsııa oqıǵanyń barlyq mán-jaıyn tergep, anyqtap jatyr.
Jetisý oblystyq polıtsııa departamenti qaza bolǵan balanyń otbasy men dostaryna kóńil aıtty.
-Qurmetti ata-analar, sizderden balalaryńyzdyń qaýipsizdigine erekshe nazar aýdarýdy jáne olardy qaraýsyz qaldyrmaýdy suraımyz. Eresekterdiń nazary men qamqorlyǵy qaıǵyly oqıǵalardyń aldyn alýǵa kómektesedi, - dep atap ótti polıtsııa.
Buǵan deıin Atyraýda 10 jastaǵy balanyń sýǵa batyp ketkeni habarlanǵan.
