Taldyqorǵanda jylý jelilerin jóndeý smetasy 85,1 mln teńgege negizsiz ulǵaıtylǵan
ASTANA. KAZINFORM – Taldyqorǵan qalasynda magıstraldyq jylý jelilerin rekonstrýktsııalaý jobasynyń quny 85,1 mln teńgege negizsiz ulǵaıtylǵany anyqtaldy.
Taldyqorǵan qalasynyń prokýratýrasy memlekettik ınvestıtsııalyq jobalardy iske asyrýǵa bólingen bıýdjet qarajatynyń tıimdi paıdalanylýyna taldaý júrgizgen.
Tekserý barysynda qaladaǵy magıstraldyq jylý jelilerin rekonstrýktsııalaý jobasynyń smetalyq qujattamasynan qate anyqtaldy. Atap aıtqanda, alynatyn asfaltobeton massasyn esepteý kezinde onyń qabatynyń qalyńdyǵy eskerilmegen.
Sonyń saldarynan shyǵarylýǵa tıis qaldyqtardyń massasy naqty 5 273,7 tonnanyń ornyna 105 474 tonna dep kórsetilgen. ıAǵnı kórsetkish 20 ese artyq eseptelgen.
– Prokýrorlyq qadaǵalaý aktisin qaraý nátıjesinde sharttyń quny 85,1 mln teńgege tómendetildi. Bul bıýdjet qarajatynyń negizsiz jumsalýyna jol bermeýge múmkindik berdi, – delingen prokýratýra habarlamasynda.
Vedomstvo málimetinshe, jalpy Jetisý oblysy boıynsha prokýrorlyq qadaǵalaý sharalarynyń nátıjesinde 1,2 mlrd teńgeden astam bıýdjet qarajatynyń negizsiz jumsalýynyń aldy alynǵan.
Jetisý oblysynyń prokýratýrasy bıýdjet qarajatyn tıimdi paıdalaný jáne negizsiz shyǵyndarǵa jol bermeý baǵytyndaǵy jumystar jalǵasatynyn málimdedi.
Aıta keteıik, Jambyl oblysynda vagon beremiz dep 22 mln teńge alǵan kúdiktiler ustaldy.
