Taldyqorǵanda jer úıdegi gaz jarylysynan taǵy bir adam kóz jumdy
TALDYQORǴAN. KAZINFORM- Taldyqorǵan qalasynda úı órtenip, kúıik shalǵan 7 adamnyń taǵy bireýi aýrýhanada kóz jumdy. Bul týraly Jetisý oblystyq densaýlyq saqtaý basqarmasy málimdedi.
Qala irgesindegi 3- shi bólimshede bolǵan apattan úıdiń ıesi mert bolǵanyn jazǵanbyz.
Keshe túnde otbasynyń taǵy bir múshesi aýrýhanada kóz jumdy. Jetisý oblystyq densaýlyq saqtaý basqarmasy qaıtys bolǵandardyń erli- zaıypty ekenin habarlady.
- Búgingi kúnge deıin zardap shekken jeti adamnyń ekeýi qaza boldy. Olar erli-zaıypty. Reanımatsııa bóliminde denesiniń 38-40 paıyzyn kúıik shalǵan taǵy 1 naýqas jatyr. Onyń jaǵdaıy da óte aýyr dep baǵalanyp otyr. 4 naýqastyń jaǵdaıy turaqtalyp, olar travmatologııa bólimine aýystyryldy, - dedi Jetisý oblystyq densaýlyq saqtaý basqarmasynyń baspasóz qyzmeti.
Quzyrly organ ókilderi tarapynan da apatqa qatysty qylmystyq is qozǵaldy. «QazaqGaz Aimaq» AQ- y tabıǵı gaz qubyrlary tekserilgenin málimdedi.
- Úıdiń aýmaǵyn jáne oǵan irgeles aýmaqty tekserý barysynda gaz qyzmetiniń qyzmetkerleri sý qubyry men kárizdiń aralas kommýnıkatsııalarynyń qudyqtarynda gazdaný belgilerin anyqtady. Gazdyń aǵyp ketý kózin naqtylaý úshin jeke orta qysymdy jerasty gaz qubyrynyń osi boıymen, sondaı-aq «QazaqGaz Aimaq» AQ paıdalanýdaǵy tómen qysymdy jerasty eki gaz qubyryn burǵylap, tekserý júrgizildi. Burǵylaý uńǵymalarynan alynǵan synamalarda gazdyń joǵary kontsentratsııasy anyqtaldy, - dedi «QazaqGaz Aimaq» AQ ókilderi.
Qaýipsizdik tehnıkasy jónindegi nusqaýlyqtarǵa sáıkes, gaz jelilerin paıdalaný jáne jóndeý qyzmetiniń mamandary tómen qysymdy jerasty gaz qubyrlarynyń sapasyn tekserdi. Qazir gaz jelilerinde gaz shyǵyp jatqan joq, qalypty jaǵdaıda jumys istep tur. Eske salaıyq, osyǵan deıin TJM qutqarýshylary Mańǵystaý oblysynda er adamdy qutqarǵanyn jazǵanbyz.