Taldyqorǵanda jappaı tóbeleske qatysqan 8 adam ustaldy

30 jeltoqsan kúni Taldyqorǵan qalasyndaǵy kafelerdiń birinde shý shyǵyp, kelýshiler arasyndaǵy kıkiljiń jappaı tóbeleske ulasty. Oqıǵa ornyna kelgen polıtsııa úsh adamdy ustady, dep habarlaıdy Kazinform.

Búgin Jańa jyl qarsańynda qala turǵyndarynyń tynyshtyǵyn buzǵan oqıǵa jaıynda málimdeme jasaǵan Jetisý polıtsııasy jappaı tóbeleske qatysy bar taǵy 5 adamnyń qamaýǵa alynǵanyn jarııa etti.

- Ustalǵandarǵa qatysty Qylmystyq kodekstiń 293-babynyń 2-tarmaǵy boıynsha is qozǵaldy. Kúdiktiler qoǵamdyq orynda tártipsizdik uıymdastyryp, toptyq tóbeleske qatysqany úshin aıyptalyp otyr, - deıdi Jetisý oblysy Polıtsııa departamentiniń basshysy Arman Sadanov.