Taldyqorǵanda voleıboldan Qazaqstan chempıonatynyń úshinshi týry bastalady

TALDYQORǴAN. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonaty úshinshi týrynyń oıyndary bastalady.

Atyraý men Pavlodarda ótken eki týrdan keıin Oraldyń «Jaıyǵy» 31 upaımen jekedara kósh bastap keledi.

Osyǵan deıin qatarynan on ret jeńiske jetken Vıktor Kozık shákirtterin Taldyqorǵanda kim toqtata alady?

Seısenbi kúni oraldyqtar ótken jylǵy el chempıony «Tarazben» oınaıdy. 

Týrnır kestesinde 26 upaımen ekinshi orynda turǵan aqtóbelikter tórtinshi satydaǵy «Býrevestnık» (Almaty) komandasymen synǵa túsedi. 

«Jetisý» ótken jylǵy kúmis júldeger «Pavlodarmen» kúsh synasady. Ázirge 24 upaımen úzdik úshtikti túıindegen taldyqorǵandyqtar óz alańynda upaı qoryn tolyqtyrýǵa tyrysatyny anyq. 
Altynshy satydaǵy «Atyraý» kósh sońyndaǵy «Ushqyn-Kókshetaýmen» sheberlik baıqasady.

Taldyqorǵandaǵy oıyndar 29 qańtarda máresine jetedi. 

Eske sala keteıik, budan buryn Oraldyń «Jaıyǵy» jyldyń sońǵy matchyn jeńispen túıindegenin jazǵan edik.