Taldyqorǵanda voleıboldan áıelder arasynda Qazaqstan chempıonatynyń tórtinshi týry bastalady

TALDYQORǴAN. KAZINFORM – Taldyqorǵan qalasynda búgin voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi týry bastalady.

Úsh týrdan keıin týrnır kestesinde «Jetisý» klýby 58 upaımen jeke-dara kósh bastap keledi.

Taldyqorǵandyqtar óz alańynda upaı qoryn tolyqtyrýǵa tyrysatyny anyq.

Ekinshi oryndaǵy óskemendik «Bereldiń» «Jetisýdan» úsh-aq upaıy kem. Alǵashqy eki oryndy ıelengen komandalar birden jartylaı fınalǵa joldama alady. Buǵan «Jetisý» men «Berelden» basqasynyń qol jetkizýi ekitalaı. Degenmen tórtinshi týrdyń alǵashqy kúni-aq qos ortalyq kezdesý ótedi. Óskemendikter úshinshi satydaǵy «Qýanyshpen» (SQO) sheberlik baıqassa, taldyqorǵandyqtar ótken jylǵy el chempıony «Turandy» (Túrkistan) synap kóredi.

Sondaı-aq sársenbi kúni «Gratsııa KZ» - «Aqtóbe», «Ertis» - «Almaty», «Arý-Astana» - «Qaraǵandy» komandalary ózara kezdesedi.

Klýbtar osy týrda pleı-off kezeńine shyǵýǵa múmkindik beretin úzdik segizdikke iligý úshin baryn salady. Nebári 2 upaıy bar 10-oryndaǵy «Ertistiń» odan úmitin úzgeni anyq. Al 8-satyǵa 14 upaıy bar «Arý-Astana» men «Gratsııa KZ» (11 upaı) talasatyn bolar. Bul eki klýbtyń 9 aqpanda ótetin ózara básekesinde biraz másele sheshilip qalýy yqtımal.

Eske sala keteıik, budan buryn sońǵy týr aldynda «Qýanyshtyń» úzdik úshtikti túıindep turǵanyn jazǵan edik.