Taldyqorǵanda ulttyq naqyshtaǵy 36 jańa aıaldama ornatylady
TALDYQORǴAN. KAZINFORM - Oblys ortalyǵyna bıyl ulttyq naqyshta 36 aıaldama ornatý josparlanyp otyr. 1 aıaldama kesheniniń quny - 8 mln teńgege jýyq.
Taldyqorǵan qalalyq ákimdiginiń baspasóz qyzmetiniń málimetine súıensek, qalada jalpy sany 282 aıaldama bar. Onyń 21-i — zamanaýı úlgide salynǵan smart aıaldamalar.
2018 jyly qoldanysqa berilgen olardyń basym bóligi panasyzdardyń mekenine aınalyp, áınegi shaǵylyp, esigi jabylyp qalǵan edi. Adam kórgisiz jaǵdaıǵa jetken aıaldamalardy ákimdik 5 jylǵa senimgerlik basqarýǵa berip, qalpyna keltirý jumystary ótken jyldyń kúzinde bastalǵan bolatyn. Bıyl tolyq aıaqtalady dep otyr. Qala ortalyǵynan shetkeri turatyn turǵyndardyń bir máselesi osy jelde yq, jaýynda pana bolar aıaldama edi.
— Taldyqorǵan qalasyna 2025 jyly 36 aıaldama ornatý josparlanyp otyr. Jalpy quny — 281 mln teńge. Onyń 100 mln. teńgesi bólindi. Aıaldamanyń ózi basy ǵana 2 mlnǵa jýyq turady. Jalpy 1 aıaldama kesheniniń qurylysy — 8 mln jýyq. Onyń ishine avtobýstyń kirý jıegi, abattandyrylýy, qoqys jáshigi t. b. kiredi. Osylaısha aıaldamalardyń jalpy sany 318-ge jetedi, - dedi qalalyq jolaýshylar kóligi jáne avtomobıl joldarynyń bóliminen.
Jańa aıaldamalar ulttyq naqyshta bolady. Qala ortalyǵynan bólek soltústik-batys turǵyn úı alabyndaǵy Álimjanov kóshesine, batys turǵyn aýdanynyń Araıly, Beriktas, Qyzylqaıyń, Ǵalymdar kóshesine jáne shyǵys shaǵyn aýdany men Balaýsa turǵyn úı alabyna ornatylady dep josparlanǵan.
Eske salaıyq osyǵan deıin bıyl Taldyqorǵanda qandaı joldardyń jóndeletinin jazǵanbyz.