Taldyqorǵanda turǵyndar úı aýlasynda jeke ǵımarat salýǵa qarsy shyqty
TALDYQORǴAN. KAZINFORM - Taldyqorǵan qalasyndaǵy «Birlik» shaǵyn aýdanynyń turǵyndary úıleriniń aýlasynda salyna bastaǵan qurylysqa qarsy shyqty. Olar bul ǵımarat salynsa, úıge kirip-shyǵatyn jol jabylady dep dabyl qaǵyp otyr.
Balapanov kóshesindegi turǵyn úı 2019 jyly salynǵan. Mamandardyń aıtýynsha, sáýlet-qurylys talaptary boıynsha, úıdiń eki jaǵynan da 3 metrden oryn qalýy kerek. Alaıda, turǵyn úı dúken, dámhana syndy nysandardyń qaq ortasynda qalǵan. Aýlaǵa jedel járdem syndy úlken kólikteri kire almaıdy.
«Aýlamyzǵa kiretin, aýlamyzda tynystaıtyn jer joq. Órt sóndirý kólikteri kire almaıdy. Myna qurylysty salsa, jaǵdaıymyz ne bolmaq? Bizdiń janaıqaımyzdy nege eshkim tyńdamaıdy? Barmaǵan jerimiz joq, bizdiń únimizdi nege estimeıdi?» - deıdi úıdiń turǵyny Maral Toqsanbaeva.
«Bir aıaǵym tórde, bir aıaǵym kórde. Qandaı bir jaǵdaı bolsa, tabyt qoıatyn oryn joq, jerdiń bári jekemenshikke ótip ketken, mine jan-jaǵymyz túgel qorshalǵan. Bul ne degen sumdyq?» - deıdi Saılaýbaı Meıirov.
«Biz bul qurylysqa qarsymyz, qurylysty toqtatsyn», - deıdi Gúlnár Basanova.
Al jeke kásipker bul aýmaqqa 5 qabatty ǵımarat salyp, 1-qabatynan medıtsınalyq ortalyq ashpaq. Ol jańa nysan qurylysyn bir jyldyń ishinde aıaqtaýdy josparlap otyr.
«Bul jerdi byltyr alǵanbyz, qurylys júrgizýge ruqsat qaǵazdarymyz bar, sondyqtan turǵyndar talabyn oryndaı almaımyz», - deıdi «Eńbek qazyna» kompanııasynyń ókili Qýanysh Qadyrov.
Sheneýnikterdiń aıtýynsha, olqylyq jobalaý jumystary kezinde ketken. Qala ákiminiń orynbasary kásipker ázirge turǵyn úı mańyndaǵy jerdi jalǵa alyp otyrǵanyn, qurylysty aıaqtaǵan soń memleketten jerdi satyp alýǵa quqyly ekenin aıtty.
«Kezinde, osy turǵyn úı alabyn josparlaǵan kezde, josparlaýda qatelikter jiberilgen. Biz ony bilemiz, osy dúnıeni josparlaǵan azamattar búgingi tańda qala basshylyǵynyń qyzmetinde joq. Qurylys obektisin júrgizip jatqan tulǵamen máseleni qarastyratyn bolamyz. Óıtkeni, azamattardyń talaby qurylys nysanyn toqtatý bolyp tur, bul máseleni jeke talqylaýymyz kerek», - deıdi Taldyqorǵan qalasy ákiminiń orynbasary Jeńis Andabekov.
Eske sala keteıik, buǵan deıin Almaty qalasyndaǵy «Abay 130» turǵyn úı kesheniniń turǵyndarynyń úı janynda japsarlaı salyna bastaǵan qurylysqa qarsylyǵy týraly jazǵanbyz.
Aıbek Quttybek
