Taldyqorǵanda tegistegish bolat shar óndiretin zaýyt salynady

ASTANA. KAZINFORM – Taldyqorǵanda Chılı kompanııasy tegistegish bolat shar óndiretin zaýyt salady. Jańa kásiporynnyń irgetasyn qalaý kelesi jylǵa josparlanyp otyr. Bul týraly oblys ákimdiginiń baspasóz qyzmeti habarlady.

Oblys ákiminiń orynbasary Áset Qanaǵatov sheteldik ınvestorlarmen ótken kezdesýde iri ınvestıtsııalyq jobany iske asyrý jumystary kelisimshartqa qol qoıylǵan sátten júıeli túrde júrgizilip kele jatqanyn atap ótti.

- Investıtsııalyq jobalar – ekonomıkanyń eń mańyzdy draıveri. Jetisý oblysynda birqatar iri ınvestıtsııalyq jobalar júzege asyrylýda. Negizgi qujattarǵa qol qoıylyp, birneshe kezdesý ótkizilgennen keıin biz óz tarapymyzdan bolashaq zaýytty ornalastyrý úshin «Taldyqorǵan» ındýstrıaldy aımaǵynan jer telimin daıyndadyq. Oblys basshylyǵy atynan qoldanystaǵy zańnama aıasynda ınvestjobaǵa barynsha qoldaý kórsetiletinin aıtqym keledi. Bul joba óńir ekonomıkasyna mýltıplıkatıvti áser berip qana qoımaı, turaqty jumys oryndarynyń ashylýyna yqpal etedi, – dedi Á. Qanaǵatov.

Ol sondaı-aq jobany iske asyrý merzimderi men qurylys jumystarynyń aldyn ala kestesine qatysty birqatar naqty máselelerdi alǵa tartty.

«ME Elecmetal» kompanııasynyń bas dırektory Eýhenıo Arteaga atap ótkendeı, Jetisý oblysy strategııalyq turǵydan qolaıly geografııalyq ornalasýǵa ıe, qajetti logıstıka men energetıka salasyndaǵy resýrstarǵa baı, bul daıyn ónimdi tabysty júzege asyrýǵa múmkindik beredi.

– Bizdiń joba metallýrgııa salasyn damytýǵa baǵyttalǵan. Ónim ishki naryqta da, Ortalyq Azııa elderine de eksportqa jiberiletin bolady. Barlyq uıymdastyrý máselesi sheshilgennen keıin keler jyldyń naýryz aıynda bolashaq zaýyttyń irgetasyn qalaýdy josparlap otyrmyz, – deıdi kompanııa dırektory.

Sondaı-aq jobany iske asyrýdyń negizgi kezeńderi týraly egjeı-tegjeıli aıtyp berdi.

Kezdesý sońynda qos tarap jobaǵa qatysty barlyq aǵymdaǵy máselelerdi talqylap, ekonomıkalyq yntymaqtastyqty odan ári keńeıtý týraly kelisti.

Aıta keteıik, jýyrda Úkimet basshysynyń orynbasary Qanat Bozymbaev ınvestorlardyń quqyǵyn qorǵaý arhıtektýrasy kúsheıtiletini týraly aıtqan bolatyn.