Taldyqorǵanda taekvondodan Respýblıkalyq ashyq týrnır ótip jatyr
TALDYQORǴAN. KAZINFORM — Taldyqorǵanda Qazaqstan Respýblıkasynyń máslıhattarynyń qurylǵanyna 30 jyl tolýyna oraı taekvondodan Respýblıkalyq ashyq týrnır bastaldy. Bul týraly Jetisý oblysy ákiminiń baspasóz qyzmeti málim etti.
«Jastar» sport saraıynda bastalǵan týrnırdiń ashylý saltanatyna Jetisý oblysynyń ákimi Beıbit Isabaev, Týrızm jáne sport vıtse-mınıstri Mıras Tólebaev, Pekın Olımpıadasynyń qola júldegeri, Qazaqstan taekvando federatsııasynyń vıtse-prezıdenti Arman Chılmanov jáne Parlament Májilisiniń birqatar depýtattary qatysty.
— Qazaqstan Respýblıkasy máslıhattarynyń qurylǵanyna 30 jyl tolýyna arnalǵan taekvondodan Respýblıkalyq ashyq týrnırge qosh keldińizder! Qoǵam ómirinde dene shynyqtyrý men sporttyń orny qashanda erekshe. Úlken sportta aıtýly jetistikke jetý eldiń abyroıy men bedelin kóterse, buqaralyq sportty damytý ult saýlyǵyna, salamatty ómir saltyn nasıhattaýǵa, urpaq tárbıesine zor yqpal etedi. Búginde sportpen shuǵyldanatyn azamattardyń sany jyldan jylǵa ósip búginde jetisýlyqtardyń 39,2 paıyzy sportqa tartylǵan. Solardyń ishinen ózderińiz sekildi talapty jasóspirimder men jastar kóptep shyǵatynyna senimdimin, — dedi oblys ákimi Beıbit Isabaev.
Oblys basshysy oblysta júrgizilip jatqan sport nysandarynyń qurylysy men materıaldyq bazasyn nyǵaıtý jumystaryna qysqasha toqtalyp, sportshylarǵa sáttilik tiledi.
Sol sııaqty birqatar qonaqtar sóz alyp, sporttyq jarystyń ashylýymen quttyqtady. Munan soń Dánesh Raqyshev atyndaǵy Jetisý oblystyq fılarmonııasynyń shaǵyn kontserttik baǵarlamasy usynyldy.
Jalpy bul chempıonatyna elimizdiń ár túkpirinen kelgen 8-17 jas aralyǵyndaǵy 400-ge jýyq jas taekvondoshy qatysyp jatyr. Jarys eki kúnge sozylady.
