Taldyqorǵanda tabıǵı gaz aýaǵa atqylady

TALDYQORǴAN. KAZINFORM — Taldyqorǵanda tabıǵı gaz atqylap, ıisi qalany alyp ketti. 

Onyń vıdeosy áleýmettik jelide tarady.  Beınejazbadan qubyrdan býdaqtap shyǵyp jatqan gazdy kórýge bolady.

Tótenshe jaǵdaılar departamentiniń málimetinshe, 10 shilde kúni departament qyzmetine gaz ıisi boıynsha shaqyrtý kelip túsken.

— Oqıǵa ornyna jetken qutqarýshylar jerasty joǵary qysymdy gaz qubyryndaǵy taratý jelisinen gazdyń janýsyz shyǵyp jatqanyn anyqtady. Apat saldarynan órt bolǵan joq. Gazdyń shyǵýy ýaqytynda toqtatyldy. Qazirgi tańda qaýip seıildi, — dep habarlady vedomstvodan.

Qazir onda apattyq gaz qyzmeti jumys istep jatyr. Tıisti mamandar jaǵdaıdy tolyq baqylaýǵa aldy.

Buǵan deıin Qaraǵandyda salynyp jatqan gaz taratý jelilerinde jarylys bolǵany týraly jazǵanbyz.