Taldyqorǵanda sıntetıkalyq esirtkimen ustalǵan kúdikti qamaýǵa alyndy
TALDYQORǴAN. KAZINFORM — Jetisý oblysynda esirtki zattarynyń zańsyz aınalymyn anyqtap, onyń jolyn kesý baǵytynda kezekti arnaıy operatsııa sátti júzege asyryldy, dep habarlaıdy Polisia.kz.
Jedel-izdestirý is-sharalary barysynda Taldyqorǵan qalasynda Kóksý aýdanynyń 28 jastaǵy turǵyny ustaldy. Tintý kezinde kúdiktiniń qaltasynan qara ızolentaǵa oralǵan 20 zip-paket tabylyp, olardyń ishinen jalpy salmaǵy 39 gramnan asatyn sıntetıkalyq kannabınoıd tárkilendi.
Atalǵan derek boıynsha sotqa deıingi tergeý amaldary bastalyp, kúdikti qamaýǵa alyndy. QR Qylmystyq kodeksiniń 297-babyna sáıkes, esirtki zattaryn zańsyz satyp alý, saqtaý, tasymaldaý, jóneltý nemese satý 7 jyldan 12 jylǵa deıin bas bostandyǵynan aıyrý jáne múlikti tárkileý túrindegi jazaǵa ákep soǵady.
Quqyq qorǵaý organdary qoǵamdyq qaýipsizdikke nuqsan keltirip, azamattardyń ómiri men densaýlyǵyna qater tóndiretin zań buzýshylar úshin jaza qatań, ári bultarmas ekenin eskertedi.
— Esirtki — qazirgi qoǵamnyń eń aýyr derti. Ásirese, ol jastardyń bolashaǵyna balta shaýyp, ómirin qurdymǵa jiberedi. Sondyqtan polıtsııa qyzmetkerleri esirtki qylmysymen kúresti óz qyzmetiniń basty basym baǵyty retinde jalǵastyryp keledi. Polıtsııa azamattardy qyraǵylyq tanytýǵa jáne esirtki aınalymyna qatysty kez kelgen derek týraly dereý habarlaýǵa shaqyrady. Tek qoǵam men quqyq qorǵaý organdarynyń birlesken kúshimen ǵana osy qaýipti indettiń taralýyna tosqaýyl qoıýǵa bolady, — delingen aqparatta.
Eske salaıyq, buǵan deıin AQSh-tan Almatyǵa esirtki jetkizgen qylmystyq top ustalǵany týraly jarııaladyq .