Taldyqorǵanda sıntetıkalyq esirtki saqtaǵan Aqtóbe oblysynyń turǵyny ustaldy

TALDYQORǴAN. KAZINFORM – Taldyqorǵan qalasy kósheleriniń birinde patrýldeý barysynda patrýldik polıtsııa rotasynyń qyzmetkerleri sıntetıkalyq esirtki zattaryn zańsyz saqtady degen kúdikpen 26 jastaǵy Aqtóbe qalasynyń turǵynyn ustady. 

Polisia.kz-tiń málimetinshe, jeke tintý kezinde er adamnyń syrt kıiminiń qaltasynan qyzyl jáne kók tústi ızolentamen oralǵan, ishinde erekshe ıisi bar aq tústi zaty bar 66 oramadan turatyn polıetılen paket tabylyp, tárkilendi. Sot-hımııalyq saraptamanyń qorytyndysyna sáıkes, tárkilengen zat sıntetıkalyq esirtki quraly – mefedron bolyp shyqty.

Kúdikti ýaqytsha ustaý ızolıatoryna qamaldy. Qazirgi ýaqytta bolǵan oqıǵanyń barlyq mán-jaıyn, sondaı-aq esirtki jetkizý arnalary men iske qatysy bar ózge de tulǵalardy anyqtaýǵa baǵyttalǵan qajetti tergeý áreketteri júrgizilip jatyr.

Polıtsııa esirtki quraldarynyń zańsyz aınalymy, onyń ishinde saqtaý jáne taratý — Qazaqstan Respýblıkasynyń zańnamasyna sáıkes, qatań qylmystyq jaýapkershilikke ákep soǵatynyn eskertedi. Internet pen messendjerler arqyly jeńil tabys tabýǵa umtylý kóbine uzaq merzimge bas bostandyǵynan aıyrýmen aıaqtalady.

Buǵan deıin Shymkentte polıtsııa sıntetıkalyq esirtkiniń iri partııasyn tárkilegenin jazǵan edik.