Taldyqorǵanda sary maıdyń quramynan ishek taıaqshasy shyqty
TALDYQORǴAN. KAZINFORM - Qaladaǵy dúkenderdiń birinen maılylyǵy 82,5% bolatyn ónim satyp alynyp Densaýlyq saqtaý mınıstrligine qaraıtyn akkredıttelgen zerthanaǵa tekserýge tapsyrylǵan. Ónimdi keshendi zertteý kezinde ishek taıaqshasy tobynyń bakterııalary (BGKT) tabyldy.
Mamandar anyqtalǵan bakterııa densaýlyqqa qaýip tóndiredi, ásirese ishek ınfektsııasyn juqtyrý múmkindigin eskersek, aýyr zardaptarǵa ákelýi múmkin deıdi.
Sondaı aq, Jetisý oblysynda Reseıden keletin shujyq jáne sút ónimderi tehnıkalyq reglament talaptaryna saı kelmegen.
«Reıseıden kelgen sút ónimi «Babýshkına krynka» men «Cherkızova» shujyǵyna tyıym salý týraly sheshim qabyldadyq. Óıtkeni olar tehnıkalyq reglament talaptaryna sáıkes kelmeıdi. Ónimniń syrtyn qaptaǵan qaǵaz-tselofanda tutynýshyǵa memlekettik tilde aqparat jazylmaǵan», - deıdi QR Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Jetisý oblysy boıynsha departament basshysy Bıbigúl Omarova.
Tutynýshylar quqyǵyn qorǵaý komıteti mamandarynyń málimetinshe, Petropavlda «halal» dep satylǵan jylqy eti konservilerinde shoshqanyń DNQ-sy anyqtalǵan.
«Azyq-túlik ónimderin zertteý hattamasyna sáıkes Petropavl qalasynda satyp alynǵan «Jylqy eti «halal» konservilerinde shıkizat quramy boıynsha sáıkessizdik anyqtaldy. Joǵary sezimtal synaq jınaǵyn qoldana otyryp júrgizilgen zertteýde óndiriste shoshqanyń DNQ-sy tabyldy. Sonymen qatar, óndirýshi óz ónimderin jarnamalaı otyryp, ónimniń «Halal» talaptaryna sáıkestigi quramdas ıngredıentterdiń joǵary sapasyn, quramynda jeýge tyıym salynǵan komponentterdiń joqtyǵyn rastaıdy dep málimdeıdi»,- deıdi QR SIM Tutynýshylar quqyǵyn qorǵaý komıteti. Eske salaıyq buǵan deıin «Sapaly ónim» jobasynyń nátıjeleri habarlandy.
