Taldyqorǵanda propan tıelgen eki tsısterna relsten shyǵyp ketti

TALDYQORǴAN. KAZINFORM – 31 qańtar kúni Taldyqorǵan qalasynda temirjolda tótenshe jaǵdaı boldy.

Saǵat 21:23-te Abylaı han kóshesindegi tuıyq temirjol tarmaǵynda propan tıelgen eki tsısterna relsten shyǵyp ketip, aýdarylǵan. Oqıǵa jaqyn mańdaǵy turǵyndar arasynda alańdaýshylyq týdyrdy.

Jetisý oblysy tótenshe jaǵdaılar departamentiniń málimetinshe, gazdyń syrtqa shyǵýy tirkelmegen, turǵyndar úshin eshqandaı qaýip joq.

– Oqıǵa bolǵan boıda oqıǵa ornyna jedel qyzmetter jiberildi. Atap aıtqanda, TJD-nyń 25 qyzmetkeri men 7 tehnıkasy, sondaı-aq polıtsııa men jergilikti atqarýshy organdardyń ókilderi tartyldy. Іs-qımyldy úılestirý úshin jedel shtab quryldy, – dep tolyqtyrdy vedomstvodan.

Qaýipsizdik maqsatynda Abylaı han kóshesiniń atalǵan ýchaskesi ýaqytsha jabyldy. Qala turǵyndarynan saqtyq sharalaryn saqtap, oqıǵa ornyna jaqyndamaý suraldy.

Qutqarýshylardyń habarlaýynsha, temirjol zaqymdanbaǵan. Oqıǵa saldarynan zardap shekkender joq. Jaǵdaı mamandardyń baqylaýynda.

Buǵan deıin Aqmola oblysynda poıyz vagondary relsten shyǵyp ketkeni habarlanǵan bolatyn.