Taldyqorǵanda polıtseıler sýıtsıdtiń aldyn aldy
ASTANA. KAZINFORM – Taldyqorǵan qalasynyń polıtseıleri segizinshi qabattan sekirmek bolǵan 20 jastaǵy jigitti qutqaryp, qaıǵyly oqıǵanyń aldyn aldy, dep habarlaıdy Kazinform agenttiginiń óńirdegi tilshisi.
Quqyq qorǵaý organdarynyń málimetinshe, 20 jastaǵy jas jigit segizinshi qabatta turyp, ózine qol jumsamaq bolǵan.
Oqıǵa ornyna polıtsııa qyzmetkerleri Dýlat Maqsatov pen Batyrjan Ábilqan jedel jetken. Olar jigitpen jaqynyraq sóılesip, qoldaý sózderin aıtyp, ony sabyrǵa shaqyryp, qaıǵyly jaǵdaıdyń aldyn aldy.
– Polıtsııa qyzmetkerleriniń saýatty, batyl ári der kezinde qabyldaǵan áreketteriniń arqasynda qaıǵyly oqıǵaǵa jol berilgen joq. Medıtsınalyq qyzmetkerler kelgenge deıin polıtseıler jas jigittiń janynda bolyp, oǵan qajetti qoldaý kórsetip, jaǵdaıdy baqylaýda ustady, – dep habarlady polıtsııadan.
Jedel járdem brıgadasy kelgennen keıin jas jigit odan ári tekserý men qajetti kómek kórsetý úshin medıtsına qyzmetkerlerine tapsyryldy.
Eske sala ketsek, buǵan deıin Atyraýda 14 jastaǵy jasóspirimniń saýda-oıyn-saýyq ortalyǵynda bıikten sekirip, shatyrdy tesip ótkeni habarlanǵan.
