Taldyqorǵanda polıtseıler órtengen úıdiń turǵyndaryn qutqardy

TALDYQORǴAN. KAZINFORM — Taldyqorǵan qalasynyń Qaratal shaǵynaýdanynda bes qabatty turǵyn úıdiń bir páterinde órt shyqty. Jedel qyzmetterdiń úılesimdi ári batyl áreketteriniń arqasynda qaıǵyly jaǵdaıǵa jol berilmedi, dep habarlaıdy Polisia.kz.

Oqıǵa ornyna patrýldik polıtsııa rotasynyń úsh ekıpajy jedel jetti. Eki ekıpaj aýmaqty qorshaýǵa alyp, aýla men podezdegi qaýipsizdikti qamtamasyz etti. Sondaı-aq tótenshe jaǵdaılar departamentiniń bólimshelerimen birlesip, turǵyndardy evakýatsııalaý jumystaryn uıymdastyrdy.

Evakýatsııa barysynda patrýldik polıtsııa rotasynyń qyzmetkeri Nurbek Tólebekov besinshi qabatta qoıý tútin ishinde adamdar qalýy múmkin ekenin baıqaǵan. Ol áriptesi — patrýldik polıtsııa rotasynyń qyzmetkeri Nurǵısa Akmatovpen birge dereý besinshi qabatqa kóterilgen. 

Tútinge toly jerde er adam men balalar bolǵan. Polıtsııa qyzmetkerleri tútin ármen qaraı tarap ketpes úshin esikti jaýyp, otbasyn qaýipsiz jerge shyǵardy. Balalardy polıtseıler qoldaryna kóterip, jedel járdem brıgadasyna tapsyrdy.

TJD-nyń órt sóndirý bólimsheleri órtti jedel túrde oqshaýlap, tolyqtaı sóndirdi.

Polıtsııa men qutqarý qyzmetkerleriniń batyldyǵy, kásibıligi jáne naqty úılesimdi is-qımylynyń nátıjesinde adamdar qutqaryldy. Zardap shekkender joq. Barlyq evakýatsııalanǵan turǵyn medıtsınalyq tekserýden ótý úshin Taldyqorǵan qalasynyń kópsalaly aýrýhanasyna jetkizildi.

Aıta keteıik, Taldyqorǵanda tútin basqan úıden jeti bala qutqarylǵanyn jazdyq.