Taldyqorǵanda ózennen ótpek bolǵan kólikter muz astyna túsip ketti

ASTANA. KAZINFORM — Oqys oqıǵa Jetisý oblysy Taldyqorǵan qalasynan 5 km qashyqtyqta Balyqty ózeninde boldy, dep habarlaıdy TJM baspasóz qyzmeti.

Jetisý oblysynda Taldyqorǵan qalasynan 5 km qashyqtyqta demalys orny mańynda ózen arqyly ótý kezinde eki jeńil avtokólik jartylaı muz astyna túsip ketti.

— TJM jedel-qutqarý jasaǵynyń kúshimen kólikter Balyqty ózeniniń saǵasynan jaǵaǵa shyǵaryldy. Barlyǵy 5 adam qutqaryldy, medıtsınalyq kómek qajet bolmady, — delingen habarlamada.

TJM muz ústimen júrýdiń qaýipti ekenin eskertedi jáne qaýipsizdik sharalaryn saqtaýǵa shaqyrady.

Buǵan deıin habarlanǵandaı, Taldyqorǵanda «Aıgólek» balabaqshasynda bolǵan jaǵdaıǵa qatysty tekserý bastaldy.