Taldyqorǵanda oqýshylardy ulttyq taǵamdarmen qarsy alatyn mektep bar
TALDYQORǴAN. KAZINFORM — Taldyqorǵan qalasyndaǵy Shoqan Ýálıhanov atyndaǵy № 10 orta mektep-gımnazııasy aptanyń ár jumasynda ulttyq qundylyqtardy dáripteıdi. Ulttyq kıim kıgen ustazdar oqýshylardy tańerteń qurt, irimshik, baýyrsaqpen qarsy alady.
Jańasha bastamany Sh. Ýálıhanov atyndaǵy № 10 mektep-gımnazııanyń qazaq tili kafedrasy qolǵa alǵan. Ár jumada oqýshylar men mektep ujymy ulttyq kıim kıip, bir-birimen tek memlekettik tilde sóılesýi kerek.
Bul joba «Ulttyq kıim — brend, qazaqsha sóıleý — trend» dep atalady.
Maqsaty — bilimdi, adamı qasıetter men ulttyq qundylyqtardy boıyna sińirgen, týǵan úıin, týǵan tilin, Otanyn súıetin tulǵany qalyptastyrý.
«Ótken jyly kıim kııý, shashbaý taǵýdy uıymdastyrdyq. Bıyl qyrkúıek aıynan bastap aq dastarhan jaıýdy engizdik. Oqýshylarmen aqyldastyq. Ata-analar da kelisti. Qazir apta saıyn 7 men 10-synyp arasynda chellendj jasaımyz. ıAǵnı, ár synyptyń oqýshylary kezekpen juma kúni úıinen baryn alyp kelip, dastarhan jaıady. Qurt, irimshik, baýyrsaq, jeti nan, qytyrlaq, qymyz — bári bolady. Muny mindettemeımiz. Árkim shamasyna qaraı ákeledi. Ony barlyq mektep oqýshylarymen bólisedi», — deıdi qazaq tili men ádebıeti pániniń muǵalimi Nazgúl Janábilqyzy.
Oqýshylar da bul bastamany qýana qup alǵan. Tańǵy ýaqytta mektepke kelgende ustazdarynyń dastarhan jaıyp qarsy alýy erekshe qýanysh syılaıtynyn jetkizdi.
«Osy kún arqyly biz ulttyq qundylyǵymyzdy boıymyzǵa sińirip, ósip kele jatyrmyz. Ádemi ulttyq kıimmen júrý biz úshin maqtanysh. Úıden alyp kelip, mektep ishinde kıip júremiz. Qurt jeımiz. Qymyz ishemiz. Sonyń ózi qyzyq. Mundaı sharalardyń jıi uıymdastyrylyp turýyn qalaımyz», — deıdi 10-shy synyp oqýshysy Dılnaz Dáýlethan.
Ulttyń mol murasy dáriptelip jatqan bilim ordasynda úzilis kezinde qazaq áýenderi men kúıler oınap turady. Odan bólek «kóńildi úzilis» bar. Sabaq bastalǵansha oqýshylar dálizde qara jorǵa men túrli sergitý bılerin bıleıdi.
«Mektebimizde 1700-deı oqýshy bar. Árbir bala bul jerde ózin baqytty ári erkin seziný kerek dep esepteımin. Oqýshylar ǵana emes, kóńildi úzilisti biz de ustazdar balalarmen birge ótkizemiz. Mysaly, ótken aptada qara jorǵa bıin bıledik. Oqýshylardyń oń bastamalaryn qoldap otyramyz. Beısenbide „Taza mektep“ jobasy boıynsha synyptardy oqýshylardyń ózderi jýyp, tazalaıdy. Bul da oqý men eńbektiń egiz uǵym ekenin oqýshy sanasyna quıý», — deıdi mektep dırektory Aıjan Jumádilova.
Eske salaıyq, osyǵan deıin jetisýlyq 7 jasar Amır Aıdarhanov álem chempıonatynyń altyn júldesin ıelengenin jazǵanbyz.
