Taldyqorǵanda oqýshy qyz 16-qabattan qulap kóz jumdy
TALDYQORǴAN. KAZINFORM — Oqıǵa 16 mamyr kúni keshki jeti shamasynda, Bolashaq shaǵynaýdanynda bolǵan. Jasóspirim 16-qabattan sekirip, kóz jumdy. Oblystyq bilim basqarmasynyń málimetinshe, marqum qaladaǵy jekemenshik mektepterdiń birinde 11-synypta oqyǵan. Anasynyń aıtýynsha, boıjetken ózin jaısyz sezinip, úıinde aýyryp jatqan.
«Sabaq úlgerimi jaqsy, minezi tuıyq, synyptastarynan oqshaýlanyp júretin, mektepishilik esepke alynbaǵan. 21 mamyr kúnine UBT tapsyrýǵa tirkelgen. Áleýmettik jaǵdaıy ortasha, kópbalaly otbasy, otbasyndaǵy 4-shi bala. Sabaqqa kelmegen kúnderine densaýlyǵyna baılanysty anyqtama ákeletinin eskertken», — deıdi oblystyq bilim basqarmasynyń baspasóz qyzmeti.
Qazirgi ýaqytta tergeý amaldary júrip jatyr.
Qyzdyń kópqabatty úıden qulaý faktisi boıynsha sot-medıtsınalyq saraptama taǵaıyndalyp, tergeý bastalǵan.
«Sotqa deıingi tergeý derekteri Qylmystyq protsessýaldyq kodekstiń 201-babyna sáıkes jarııa etýge jatpaıdy», — dedi Jetisý oblystyq polıtsııa departamentiniń baspasóz qyzmeti.
