Taldyqorǵanda naýbaıhanada órt shyǵyp, bir adam zardap shekti
ASTANA. KAZINFORM — Taldyqorǵan qalasyndaǵy Jeltoqsan kóshesinde ornalasqan naýbaıhanadan órt shyqty.
Oqıǵa saldarynan naýbaıshynyń qolyn kúıik shalyp, ol medıtsınalyq kómek kórsetý úshin aýrýhanaǵa jetkizildi.
Jetisý oblysynyń tótenshe jaǵdaılar departamentiniń málimetinshe, órt búgin, 19 qazanda bolǵan. Naýbaıhananyń shatyry órtengen. Órt týraly habar túsken soń oqıǵa ornyna tótenshe jaǵdaılar departamentiniń bólimsheleri jedel jetti. Ór 78 sharshy metr aýmaqty sharpyǵan.
Órt sóndirýshiler jalyndy aýyzdyqtaýǵa kiristi. Qabyldanǵan sharalardyń nátıjesinde órt tolyq sóndirildi.
— Oqıǵa saldarynan 1986 jyly týǵan naýbaıshynyń qolyn jeńil kúıik shaldy. Zardap shekken adam medıtsınalyq kómek kórsetý úshin aýrýhanaǵa jetkizildi, — dep habarlady Jetisý oblysynyń tótenshe jaǵdaılar departamentiniń baspasóz qyzmeti.
Órtti sóndirýge departamenttiń 22 qyzmetkeri men jeti arnaıy tehnıka jumyldyryldy.
Qazir mamandar órttiń shyǵý sebebin anyqtap jatyr. Oqıǵanyń ózge de mán-jaıy naqtylanady.
Eske salaıyq, buǵan deıin Shymkentte kólik jóndeý ortalyǵynan órt shyǵyp, eki jumysshy zardap shekkenin habarlaǵan edik.
