Taldyqorǵanda memlekettik baǵdarlamamen salynǵan jańa úılerdiń sapasy syn kótermeıdi
TALDYQORǴAN. KAZINFORM – Oblys ortalyǵynda jańadan boı kótergen 9-shy shaǵyn aýdanda másele shash-etekten. Jańa úılerdiń qabyrǵasy kógerip, batareıalarynan sý ketip jatyr.
Birer jyl buryn ǵana irgesi qalanǵan jańa shaǵyn aýdan «Qulager» dep atalady. Alystan menmundalaǵan záýlim úıler baspanaǵa muqtaj qala turǵyndaryna ıpotekaǵa berilgen. Qonys toıyn toılaǵan jurttyń deni qazir qýanyshtan emes, kúıingennen kózderine jas alyp júr. Óıtkeni sý jańa úılerdiń qabyrǵasy kógerip, esik-terezelerinen jel úrlep tur. Qys bastalǵaly sýyq úıden mazamyz qashty degen turǵyndar shaǵymdaryna jaýaptylardyń qulaq aspaıtynyn jetkizdi.
– Mine, burysh-buryshtyń bári kógerip tur. Qarasha aıynda qabyrǵalar sýlanyp bastalǵanda eskertkenmin. Bireýi jasaǵan joq, bireýi qaraǵan joq. Terezelerden sý aǵyp jatyr. Bólme óte sýyq bolǵan soń jaýyp tastadym. Ashsam, búkil jylý osynda ketedi. «Aqsha bólsin, jasaımyz, bastyqqa aıtamyz» deıdi de, ketedi. Plastık esikten jel soǵady. Oǵan maqta, mata tyǵyndap qoıyp otyrmyn, – dedi 27-shi úıdiń turǵyny Narkes Ashatqyzy.
Bul aýdandaǵy úılerge jaýapty basqarýshy kompanııanyń qyzmetkeri Aıdana Baıdónenova týra maǵynasynda «syrty bútin, ishi tútin» úılerdiń kúndiz-túni elektr symdaryn kúzetýmen júretinin aıtty. Sebebi osyǵan deıin 8 elektr esepteýish qural órtenip, isten shyqqan.
– Elektr eseptegish quraldar janyp jatyr. Sebebi symdar durys bekitilmegen ári toqtyń kúshine saı emes. 3-shi úıde bir «schetchık» janyp, 68-shi páter eki kún jaryqsyz otyrdy. Jaýaptylar demalys kúnderi telefondaryn kótermeı, kelmeı qoıdy. Kúndiz bári jumysta. Bir jerden symdar balqyp, órt bola ma dep qorqamyz. Sondyqtan kúnde barlyq úıdiń elektr qoraptaryn ashyp, 24/7 osy shaǵyn aýdanda sharlap, tekserip júremiz, – dedi «Aıala» basqarýshy kompanııasynyń qyzmetkeri Aıdana Baıdónenova.
Batareıalarymyzdy aýystyryp bersin dep talap qoıǵan 5-shi úıdiń turǵyndary páterlerinde jylýdyń joqtyǵynan shetinen aýyryp jatyrmyz deıdi. Aıtýlarynsha, jylý júıesi talapqa saı jasalmaǵan.
– Men 5-shi úıdegi 49-shy páterde turamyn. Bizdegi másele – jylý. Batareıalarymyz jylymaıdy, úı sýyq. Qaıta-qaıta tazalattyq, krandaryn aýystyrdyq. Endi ol ekinshi ret tazartýǵa jaramaıdy. Sý tamshylap tur. Munda kóbi áleýmettik osal toptaǵylar, kómekke muqtaj jandar. Úılerimiz tastaı. Balalar aýyryp, kúnde jedel járdem shaqyryp jatyrmyz. Bizge alıýmınıı batareıalar qoıǵan, onyń úıdi jylytýǵa shamasy kelmeıdi. Al jylýǵa 8-9 myń teńgeden tólep jatyrmyz. Biraq jylý joq. Úıdiń nesıesin tóleımiz be, joq, batareıa aýystyramyz ba? Bizdiń talabymyz – kelesi jylǵa qaldyrmaı, bımetall qoıyp bersin. Qaǵazda qalaı kórsetilgen bolsa, solaı jasasyn. Trýbalary edende shaıqalyp tur. Terezelerge muz qatyp jatyr, – dedi Gúlstan Qaljanova.
Qulagerlikterdiń nazyna qalalyq qurylys bólimi basshysynyń orynbasary jaýap berdi. Sózinen uqqanymyz – jańa úılerdi qabyldap alǵan basshylar durys qaramaǵan. Qazir báriniń ornyna jańa basshylar kelgen, merdigermen ákimdik birigip, máseleni sheshýge kúsh salady.
– Bizge KSK da, turǵyndar da jibergen. «Schetchıkterdiń» janyp jatqanyn kórgenbiz. Merdiger uıym ony shyǵarýshy zaýytqa aparyp berdi. Birinshi sony tekserip alsyn, ol durys bolsa, toqtan zaqym kelip tur degen sóz. Ony merdiger óziniń kepildik merzimi boıynsha bárin jasap beredi. Qazir de janýy múmkin. Zaýyttyq aqaý degen de bar. Sondaı shyǵar. Jylý máselesi 5-6-7-shi úılerde týyndap tur. Jylý batareıalary alıýmınıı bolyp tur. Negizi joba boıynsha ol temir, shoıyn bolýy kerek edi, keıin protokol boıynsha aýystyrǵan. Sebebin aıta almaımyn, ol kezde basqa basshylar bolǵan. Qazir bári jańa basshylar. Ne úshin aýystyrǵandaryn naqty aıta almaımyn. Negizi alıýmınıı batareıalar talapqa saı emes. 27-shi úı boıynsha bizde 2 páterdiń qabyrǵalary kógerip jatyr. Ony biz merdiger uıymǵa jiberdik. Olar ózderi túsinbeı jatyr, biz de túsinbeı jatyrmyz, nege kógerip jatqanyn. Shatyrdy ashyp, bárin kóredi, – dedi qalalyq qurylys bólimi basshysynyń orynbasary Beknur Álıakbar.
Merdigerge osyndaı usaq-túıek eskertpeler bolady degen maman 31 qańtar kúni jaýaptylarmen birigip, atalǵan máselelerdi tolyq qarap, turǵyndarǵa jetkizemiz dep sendirdi. Eske salaıyq, osyǵan deıin Taldyqorǵanda turǵyndar úı aýlasynda jeke ǵımarat salýǵa qarsy shyqqanyn jazǵanbyz.