Taldyqorǵanda kolledj stýdentinen aqsha bopsalaǵan bozbalalar ustaldy

Jetisý polıtseıleri profılaktıkalyq is-shara aıasynda Taldyqorǵan kolledjderiniń birinde bolǵan býllıng faktisin anyqtady, dep habarlaıdy Kazinform.

On alty jastaǵy stýdenttiń minez-qulqyndaǵy ózgeristi baıqaǵan ustazdary ol jaıynda jasóspirimder isi jónindegi ınspektorǵa habarlaǵan. Jetkinshekti baqylaýǵa alǵan ıývenaldy polıtsııa ókili sol kolledjdiń joǵarǵy kýrsynda oqıtyn bozbalalar tarapynan álimjettik jasalyp, qysym kórsetilgenin anyqtaǵan. Al 1-kýrs tálimgeri býllıng jasaýshy eki eresek stýdenttiń qomaqty mólsherde aqsha bopsalaǵanyn jasyryp kelgen.

Qysymǵa shydamaǵan 16 jastaǵy jetkinshek keıinnen sabaqqa kelýden qorqatyn dárejege jetken kórinedi.

Kolledj qabyrǵasyndaǵy álimjettik faktisi boıynsha Taldyqorǵan qalalyq polıtsııasy uıymdasqan qylmysqa qarsy kúres bóliminiń qyzmetkerleri aqsha bopsalaýshylardy bultartpaıtyn aıǵaqpen ustady.

- Býllıng faktisin ıývenaldy polıtsııa ınspektory anyqtady. Jedel ýákilder jospar ázirlep, eki kúdiktini ustady. Olarǵa qatysty Qylmystyq kodekstiń 194-baby, 2-bóligi boıynsha tergeý amaldary júrgizilýde, - dep habarlady Jetisý oblysynyń polıtsııasynan.