Taldyqorǵanda kásipkerdi óltirip, kóligimen birge órtep jibergen adamǵa sot úkimi shyqty

TALDYQORǴAN. KAZINFORM - Jetisýda 2 mln teńge úshin seriktesin óltirgen azamat sottaldy. Bul týraly oblystyq Qylmystyq ister jónindegi mamandandyrylǵan aýdanaralyq sot málimdedi.

Sotta A.-ǵa qatysty «Kisi óltirý jáne bótenniń múlkin qasaqana joıý» faktisi boıynsha qylmystyq is qaraldy. Tergeý dereginshe, seriktester arasyndaǵy daý sharýa qojalyǵyn satý týraly usynystan bastalǵan. Alaıda B. oǵan kelispeı, A.-dan « 2 mln teńge aqshamdy qaıtaryp ber» dep talap etedi. B. oǵan judyryq ala júgiredi. Ashýǵa býlyqqan A. pyshaq alyp, onyń moıny men ishine suǵyp, óltiredi. Keıin qylmysyn jasyrý úshin marqumdy kóligimen birge qala syrtyna aparyp, órtep jiberedi.

- Sot úkimimen A. barlyq bap boıynsha kináli dep tanylyp, 15 jyl 6 aıǵa bas bostandyǵynan aıyryldy. Sondaı-aq sottalýshydan jábirlenýshiniń paıdasyna 27 mıllıon teńgeden astam moraldyq jáne materıaldyq shyǵyn óndirý týraly sheshim shyǵaryldy. Úkim zańdy kúshine engen joq, - dep málimdedi Jetisý oblystyq Qylmystyq ister jónindegi mamandandyrylǵan aýdanaralyq sotynyń baspasóz qyzmeti.

Eske salaıyq, osyǵan deıin Taldyqorǵan mańynda órtengen kólikten er adamnyń máıiti tabylǵanyn jazǵanbyz.