Taldyqorǵanda ıtalııalyq ýnıversıtet fılıaly resmı tirkeldi
ASTANA. KAZINFORM — Jetisý ýnıversıteti bazasynda Marche Polytechnic University fılıaly tolyq zańdy mártebege ıe boldy, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Memleket basshysy Qasym-Jomart Toqaevtyń tapsyrmasyna sáıkes elimizde jetekshi sheteldik joǵary oqý oryndarynyń fılıaldaryn ashý jónindegi mańyzdy bastama Jetisý óńirinde kezeń-kezeńimen júzege asyrylyp keledi. Óńirdiń áleýmettik-ekonomıkalyq erekshelikteri eskerile otyryp, І.Jansúgirov atyndaǵy Jetisý ýnıversıteti bazasynda Italııanyń bedeldi joǵary oqý orny — Marche Polytechnic University fılıaly ashylǵan bolatyn. Atalǵan fılıal kampýsynyń resmı ashylý saltanaty 2025 jylǵy 16 shildede Taldyqorǵan qalasynda ótti.
— Jobany iske asyrýdyń mańyzdy kezeńderiniń biri retinde І.Jansúgirov atyndaǵy Jetisý ýnıversıteti bazasynda ashylǵan Marche Polytechnic University fılıaly QR Ádilet mınıstrliginde 2026 jylǵy 2 sáýirde resmı túrde tirkelip, onyń tolyq zańdy mártebesin rastaıtyn qujat tabystaldy. Qujatta fılıaldyń zańdy mekenjaıy aıqyndalyp, basshysy taǵaıyndaldy. Qazir fılıalda 31 stýdent bilim alady: birinshi kýrsta — 19, ekinshi kýrsta — 7, úshinshi kýrsta — 5 stýdent. Oqytý «Agronomııa» — «Aýyl sharýashylyǵy ǵylymdary men tehnologııalary» baǵytyndaǵy bakalavrıattyń qos dıplomdy bilim berý baǵdarlamasy aıasynda júzege asyrylady, — delingen habarlamada.
Fılıal ınfraqurylymy zamanaýı talaptarǵa tolyq sáıkes keledi. Kampýsta Speed breeding ortalyǵy (jylyjaı), sondaı-aq tórt zamanaýı zerthanany qamtıtyn ǵylymı-zertteý ınstıtýty jumys isteıdi. Atap aıtqanda, ósimdikterdi mıkroklonaldy kóbeıtý, molekýlalyq genetıka jáne genomıka, bıotehnologııa jáne ekologııa baǵyttary boıynsha zerthanalar qyzmet atqarady.
Bilim berý úderisi 3+1 modeli negizinde uıymdastyrylǵan. Stýdentter alǵashqy úsh jyldy Jetisý ýnıversıtetinde oqyp, sońǵy oqý jylyn Italııanyń Ankona qalasyndaǵy Marche Polytechnic University bazasynda jalǵastyrady. Bul kezeńde olar ýnıversıtettiń zamanaýı zerthanalary men ǵylymı ortalyqtarynda kásibı quzyretterin tereńdetedi.
Qos dıplomdy bilim berý baǵdarlamasyn tıimdi iske asyrý maqsatynda 2025 jylǵy jeltoqsan aıynan bastap Jetisý ýnıversıtetiniń qoldaýymen ıtalıan tilin oqytý kýrstary uıymdastyryldy. Bul stýdentterdiń Italııada bilim alý barysynda pánderdi sapaly meńgerýine múmkindik beredi.
Aldaǵy kezeńde qos dıplomdy bilim berý baǵdarlamalaryn keńeıtý josparlanǵan. Atap aıtqanda, «Ekonomıka» — «Álemdik ekonomıka jáne kommertsııa» (bakalavrıat jáne magıstratýra), «Aqparattyq tehnologııalar» — «IT-ınjenerııa» (bakalavrıat jáne magıstratýra), «Ekologııa» — «Qorshaǵan ortany qorǵaý jáne orman sharýashylyǵy» (magıstratýra) baǵyttaryn iske qosý kózdeledi. Bul bastamalar Jetisý óńirin damytýdyń basym baǵyttaryna jáne Qazaqstan Respýblıkasynyń jańa mamandyqtar atlasyna sáıkes keledi.
Atalǵan fılıaldyń qyzmeti óńirdiń ǵylymı-bilim berý áleýetin arttyrýǵa, halyqaralyq akademııalyq ıntegratsııany nyǵaıtýǵa jáne básekege qabiletti kadrlardy daıarlaýǵa eleýli úles qosady dep kútiledi.
Osyǵan deıin Taldyqorǵanda qylmystyq top adamdarǵa psıhologııalyq qysym jasap, aqsha talap etkenin jazdyq.