Taldyqorǵanda ystyq sý óshirilgen soń monshalarǵa suranys artty ma
ASTANA. KAZINFORM — 20 shildeden bastap Taldyqorǵanda ystyq sý bir aıǵa jýyq ýaqytqa óshirildi. 835-ten astam kópqabatty úı, júzdegen memlekettik uıym jáne myńdaǵan jeke úı ádettegi turmystyq qolaılyqsyz qaldy. Ýaqytsha óshirý qaladaǵy monshalarǵa barýshylardyń kóptep kelýine ákeldi me? Kazinform tilshisi tutynýshylar aǵynynyń qalaı ózgergenin jáne monshalardyń suranystyń artýyna qanshalyqty daıyn ekenin zerttedi.
Taldyqorǵanda 20 shildeden 17 tamyzǵa deıin ystyq sýmen jabdyqtaý ýaqytsha toqtatyldy. «Taldyqorǵanjylýservıs» KMK málimetinshe, sýdy óshirý «Basqýat» qazandyǵy men qalanyń jylý jelilerin aldaǵy jylytý maýsymyna jyl saıynǵy daıyndaýmen baılanysty.
Kompanııanyń málimetinshe, bul kezeńde 835 kópqabatty úı, 210 memlekettik uıym, 1285 jeke úı jáne 1322 basqa tutynýshy ystyq sýsyz qalyp otyr.
«Taldyqorǵanjylýservıs» KMK dırektory Abzal Jaǵyparovtyń aıtýynsha, jóndeý jumystary qys mezgilinde jylý júıesiniń senimdi jáne úzdiksiz jumysyn qamtamasyz etý úshin qajet.
Osy arada qaladaǵy monshalar kelýshiler sanynyń artýyna daıyndalyp jatyr.
Taldyqorǵandaǵy monshalardyń biriniń dırektory, mekemeni 27 jyl basqaryp otyrǵan Anatolıı Tsıert ystyq sýdyń toqtatylýy kelýshiler sanyna áser etýi múmkin dep sanaıdy.
— Meniń oıymsha, kelýshiler aǵyny shamamen 10 paıyzǵa artady. Dýsh kabınalary erekshe qajet bolady. Keshki ýaqytta kezek paıda bolýy múmkin, — dedi ol.
Onyń aıtýynsha, monsha tolyǵymen avtonomdy jáne ortalyqtandyrylǵan ystyq sýmen jabdyqtaýǵa táýeldi emes.
— Biz sýdy óz qazandyǵymyzben jylytamyz. Árbir monsha óziniń jylytý mehanızmin paıdalanady, sondyqtan qala boıynsha ystyq sýdyń óshýi bizdiń jumysymyzǵa áser etpeıdi, — dep túsindirdi dırektor.
Bul rette úzdiksiz jumysty qamtamasyz etý úshin aıtarlyqtaı resýrstar qajet.
— Kún saıyn shamamen 12 tekshe metr ystyq sý paıdalanamyz. Sondyqtan biz kelýshilerdi ádettegideı qarsy alýǵa daıynbyz, — dep atap ótti Anatolıı Tsıert.
Anatolıı Tsıerttiń aıtýynsha, Taldyqorǵan turǵyndarynyń barlyǵy ystyq sýsyz qalmaıdy. Kóptegen jeke úı ıeleri táýelsiz ystyq sý júıeleri — qazandyqtar, gaz nemese elektrlik sý jylytqyshtardy paıdalanady, sondyqtan elektr qýatynyń úzilýi olarǵa az áser etedi.
Qolaısyzdyqtar, eń aldymen, ortalyqtandyrylǵan ystyq sý júıesine qosylǵan kópqabatty úılerdiń turǵyndaryna áser etedi.
Eske salsaq, Taldyqorǵan qalasynda ystyq sýmen jabdyqtaý 17 tamyzǵa deıin jalǵasatyn josparly jóndeý jumystary aıaqtalǵannan keıin qalpyna keltiriledi. Qala ákimdiginde atap ótilgendeı, jóndeý jumystary únemi baqylanyp otyrǵanyn, al júrgizilgen jumystar aldaǵy jylytý maýsymynda turaqty jylýmen jabdyqtaýdy qamtamasyz etýi tıis.
