Taldyqorǵanda esirtki satý arnasy áshkerelendi
TALDYQORǴAN. KAZINFORM — Taldyqorǵanda esirtki satý arnasy áshkerelenip, 5 keliden astam gashısh tárkilendi. Bul týraly Іshki ister mınıstrligi habarlady.
Taldyqorǵan qalasynda Jetisý oblysy polıtsııa departamentiniń esirtki qylmysyna qarsy is-qımyl basqarmasynyń qyzmetkerleri esirtki zatynyń zańsyz aınalymyn toqtatýǵa baǵyttalǵan jedel-izdestirý sharalaryn júrgizdi.
Operatsııa barysynda Erkin aýylynda esirtkini zańsyz saqtaý jáne satý kúdigimen Taldyqorǵan qalasynyń 62 jastaǵy turǵyny ustaldy. Tergeý áreketteri sheńberinde polıtseıler baqylaý júrgizip, kúdiktiden jalpy salmaǵy 5 gramnan asatyn gashısh esirtki zatyn satyp alyndy.
Tintý kezinde onyń turǵylyqty mekenjaıynan jasyl tústi, ózine tán ıisi bar ósimdik tektes zat salynǵan 6 polıetılen paket tárkilendi. Sonymen qatar aýladaǵy saraıdan skotchpen oralǵan úlken qara paket tabylyp, ishinde jalpy salmaǵy 5 keliden asatyn, ózine tán ıisi bar, aldyn ala boljam boıynsha gashısh esirtki zaty anyqtaldy.
Qazirgi ýaqytta atalǵan derek boıynsha sotqa deıingi tergep-tekserý amaldary júrgizilip, barlyq mán-jaılar anyqtalyp jatyr.
Kúdiktige qatysty sot sheshimimen densaýlyq jaǵdaıyna baılanysty úıqamaq túrindegi bultartpaý sharasy tańdaldy.
— Esirtkiniń zańsyz aınalymyna qarsy kúres — polıtsııa jumysynyń basym baǵyttarynyń biri. Esirtki saqtaý men taratýdyń kez kelgen deregi qatań túrde toqtatylyp, kináliler zań aıasynda jaýapkershilikke tartylady, — dep atap ótti Jetisý oblysy polıtsııa departamentinde.
QR qoldanystaǵy zańnamasyna sáıkes, esirtki quraldaryn, psıhotroptyq zattardy nemese olardyń analogtaryn ótkizý maqsatynda zańsyz satyp alý, saqtaý, tasymaldaý, jóneltý nemese ótkizý múlki tárkilenip, 7 jyldan 12 jylǵa deıin bas bostandyǵynan aıyrý jazasymen jazalanady.
Buǵan deıin Túrkistan oblysynda eki aıda 7 keliden astam esirtki tárkilengeni týraly jazǵan bolatynbyz.