Taldyqorǵanda er adam áıeldi pyshaqtap óltirdi

ASTANA. KAZINFORM — Taldyqorǵandaǵy ashanalardyń birinde janjal shyǵyp, ol qylmysqa ulasty. Shabýyl saldarynan áıel qaza tapty.

Oqıǵa týraly aqparat áleýmettik jelilerde tarady. Kýágerlerdiń aıtýynsha, janjal kezinde er adam pyshaqty alyp, áıelge birneshe ret soqqy jasaǵan. Zardap shekken áıel shuǵyl túrde medıtsınalyq mekemege jetkizilgenimen, ony aman alyp qalý múmkin bolmady.

Jetisý oblystyq polıtsııa departamentinde oqıǵa faktisi rastaldy.

— Atalǵan derek boıynsha qylmystyq is qozǵaldy. Kúdikti anyqtalyp, ustaldy. Qazirgi ýaqytta bolǵan oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr, — dep habarlady vedomstvonyń baspasóz qyzmeti.

Polıtsııa sondaı-aq ózge aqparattyń QR Qylmystyq-protsestik kodeksi 201-babyna sáıkes jarııa etýge jatpaıtynyn naqtylady.

Buǵan deıin Ulytaý oblysynda tórt balasy bar anany pyshaqtap óltirip ketken bolatyn. Otbasyn jalǵyz ózi asyrap otyrǵan áıel kúıeýimen ajyrasatynyn aıtqanda, birneshe jerinen pyshaq jaraqatyn alyp, kóz jumdy.