Taldyqorǵanda elektr jelilerin jóndeýge baılanysty jaryq óshirildi
TALDYQORǴAN. KAZINFORM – Taldyqorǵanda elektr jelilerin jóndeý jumystaryna baılanysty birqatar aýdanda jaryq ýaqytsha óshirildi. Bul týraly «TATEK» AQ habarlady.
Kompanııa málimetinshe, 6 mamyr kúni qalada elektr jelilerine aǵymdaǵy jóndeý jumystary júrgizilip, osyǵan baılanysty birneshe mekenjaıda kezeń-kezeńimen elektr energııasy ajyratylǵan.
Atap aıtqanda, saǵat 08:00-10:00 aralyǵynda Baıseıitova – Pýshkın – Jetisý sazy – Maıstrıýk kósheleri aýmaǵyndaǵy jańa shaǵynaýdandarda jaryq bolmaǵan. Saǵat 10:00-12:00 aralyǵynda oblystyq aýrýhana mańynda, ıaǵnı Eskeldi bı – Jetisý sazy – Pýshkın – Poddýbnyı kósheleri aýmaǵynda elektr qýaty óshirilgen.
Sonymen qatar 13:00-15:00 aralyǵynda Kıvılev – Abylaı han – Baıseıitova – Pýshkın kósheleri mańyndaǵy jańa qurylystar aımaǵynda, al 15:00-17:00 aralyǵynda qalanyń ortalyq bóliginde, onyń ishinde Gaýhar ana kóshesi men «Grın Vılla» turǵyn úı kesheninde jaryq ýaqytsha sóndirilgen.
Turǵyndardyń aıtýynsha, keıbir aýdandarda elektr qýaty belgilengen ýaqyttan uzaq ýaqytqa óshken. Sondaı-aq jaryqtyń ajyratylýyna baılanysty keı jerlerde baǵdarshamdar ýaqytsha jumys istemeı qalǵan.
Qala ákimdigi elektr energııasyn berý jaqyn jarty saǵat ishinde tolyq qalpyna keltiriletinin málimdedi.
Buǵan deıin «TATEK» AQ pen Taldyqorǵan ákimdigi turǵyndardy josparly óshirý jumystary týraly resmı paraqshalar men áleýmettik jeliler arqyly aldyn ala habardar etken bolatyn. Vedomstvo ókilderi mundaı sharalar elektr jelileriniń turaqty jumysyn qamtamasyz etý jáne apattardyń aldyn alý úshin qajet ekenin túsindirdi.
Kompanııa ýaqytsha qolaısyzdyqtar úshin turǵyndardan keshirim surap, túsinistikpen qaraýǵa shaqyrdy.
Sonymen qatar 2026 jylǵy 6-22 mamyr aralyǵynda magıstraldyq jelilerdi kúrdeli jóndeý jáne symdardy aýystyrý jumystary aıasynda qaladaǵy birqatar aýdanda elektr energııasy kezeń-kezeńimen óshiriletini habarlandy.
Aıta keteıik, Taldyqorǵandaǵy kópqabatty turǵyn úıdiń káriz júıesi bitelip, jórtóle sasyq sýǵa toldy.
