Taldyqorǵanda dúkendegi bank termınalyn ustaǵan balany toq soqty
TALDYQORǴAN. KAZINFORM — Dúısenbi kúni Taldyqorǵanda bala Kaspi termınalyna qolyn tıgizgen kezde toq soqty, dep habarlady Kazinform agenttiginiń menshikti tilshisi.
Balanyń saýsaqtary kúıip qalǵan. Qazirgi ýaqytta onyń jaǵdaıy turaqty, ol aýrýhanada jatyr.
Termınalǵa qol tıgizgende tok urǵan sáti beınelengen vıdeo áleýmettik jelilerde paıda boldy.
Polıtsııa qylmystyq is qozǵady, tergeý júrgizilip jatyr.
– Polıtsııa qyzmetkerleri qaýipsizdik talaptaryna sáıkes kelmeıtin taýarlardy shyǵarý nemese satý, jumystardy oryndaý nemese qyzmetterdi kórsetý faktisi boıynsha qylmystyq is qozǵady. Kámeletke tolmaǵan bala zardap shekti. Tergeý barysynda qaýipsizdik normalary men qurylǵyny ornatý erejeleriniń saqtalýy tekserilip jatyr. Eger kináli tulǵalar anyqtalsa, olar zańmen belgilengen tártippen jaýapkershilikke tartylady, – dep habarlady Jetisý oblysy polıtsııa departamenti.
Tergeý barysy oblystyq polıtsııa departamenti basshylyǵynyń erekshe baqylaýynda ekeni habarlandy.
Bank oqıǵaǵa qatysty pikir bildirdi
– 21 sáýirde Taldykorǵanda bala temir torǵa jáne azyq-túlik dúkeni aýmaǵynda ornalasqan Kaspi termınalynyń korpýsyna qol tıgizgende toq soǵyp jaraqat aldy, – dep habarlady bank ókilderi.
Bank ókilderi balanyń emdelýine qajetti barlyq kómek kórsetilip jatqanyn, onyń otbasymen baılanysta ekenin, mamandar oqıǵa sebepterin tekserip jatqanyn málimdedi.
Eske salamyz, buǵan deıin Qyzylordada muzdatqysh kameraǵa qol tıgizgennen keıin tok soǵyp qaıtys bolǵan balanyń otbasy tergeýdiń baıaý júrgizilýine narazylyq bildirgen bolatyn.
Al, Reseıdiń Irkýtsk oblysynda selfı jasamaq bolǵan jasóspirimdi toq uryp, aýrýhanaǵa túsken bolatyn.