Taldyqorǵanda daýyl turǵyn úıdiń shatyryn julyp áketti
TALDYQORǴAN. KAZINFORM — Qala turǵyndary júktegen áleýmettik jelidegi vıdeo Taldyqorǵannyń 4 shaǵynaýdanynda qatty daýyl turǵanyn kórsetedi. Olardyń málimdeýinshe, № 63,66 úılerde kúshti jel turǵyn úı kesheniniń shatyryn julyp áketken.
Eń mańyzdysy, oqıǵa barysynda adamdar zardap shekpegen. Alaıda, qurastyrmaly temir birinshi qabat turǵyndarynyń balkonyna zaqym keltirdi.
— Mine, qarańyzdar, shatyr besinshi qabattan qulaǵan. Meniń balkonymdy búldirdi. Jaýyn bastalsa úıimizdi sý basady, — deıdi vıdeodaǵy páter turǵyny.
Keleshekte dál osyndaı jaǵdaıdyń qaıtalaný yqtımaldyǵy jurtshylyqtyń úreıin týdyrady. Sondyqtan turǵyndar jaýapty organdardyń shatyr máselesi boıynsha dereý tekseris jasap, qaýipti konstrýktsııalardy alyp tastaýdy talap etip otyr.
Taldyqorǵannyń turǵyn úı ınspektsııasy bólimi áleýmettik jelilerdegi jazbany nazarǵa alǵanyn málimdedi. Mekeme taratqan málimetke saı, MIB tóraǵasyna tıisti shara qoldaný jóninde eskertý jasaldy.
Sonymen qatar, bólimshe bul máseleniń jiti baqylaýǵa alynǵanyn atap ótti.
Esterińizge sala keteıik, buǵan deıin TJM terek mamyǵy órt qaýpin kúsheıtetinin eskertken edi.
Aıaýlym Qanatqyzy
