Taldyqorǵanda DamuBala-ǵa qatysty daý shyqty: Onlaın tirkeýdiń ashylýynan jabylýy tez bolǵan
TALDYQORǴAN. KAZINFORM - Jetisý oblysynda balalardy tegin úıirmelerge qabyldaý úshin ashylǵan portal nebary 2 mınýttan keıin jabylyp qalǵan. Úıdegi ul-qyzyn tirkeı almaı qalǵan ata-analar narazylyqtaryn bildirdi. Jaýaptylar júıede aqaý joq dep otyr.
DamuBala — 4 pen 17 jas aralyǵyndaǵy balalarǵa arnalǵan úıirmelerdi izdeý jáne olarǵa jazylý platformasy. 28 qarasha kúni tańǵy saǵat 9:00–de portaldyń ashylatyny jóninde ata- analarǵa aldyn-ala habarlama berilgen. Biraq 9:00–de ashylǵan portal 2 mınýt ótpeı jabylyp qalǵan. Munyń sebebin suraǵandar oblys boıynsha kezekte turǵan 2 myń bala tolyq tirkelip úlgerdi degen jaýap alǵan.
«Meniń 4 balam bar. Ekeýin sýretke, bireýin oratorlyq kýrsqa tegin bergim keldi. Biraq 9:00 -de baza ashyldy 9:02– de jabyldy. Sebebin suraǵanda, oryn tolyp qaldy degen jaýap aldyq. Men ózim tirkeı alatyn ata-analardyń qatarynanmyn. Qanshama ata-ana tirkeı almaı otyrdy. Fızıkalyq turǵydan qaraǵanda, 2 mınýt ishinde 2 myń oryndy tirkeý múmkin emes» — dedi qala turǵyny Araı Músápirova.
120 sekýndta 2 myń bala tirkeldi degenge kásipkerler de kúmánmen qaraıdy.
«Meniń kompıýterimniń jyldamdyǵy joǵary. Sonyń ózinde úlgermedim. Saıt jaqsy jumys istedi, biraq 2 mınýtta 2 myń bala jazylyp ketti deý múmkin emes qoı. Platformanyń qaýipsizdigi durys saqtalmaǵan. Bottar, hakkerler kirip toltyrǵan sııaqty», — dedi kásipker Nurhat Sábıtov.
Narazy top bul jerde bir shıkilik baryna senimdi. Sondyqtan quzyrly organ ókilderinen tirkeýdiń qanshalyqty zańdy ótkenin tolyq tekserýdi talap etedi.
«Kezek 1-qańtardan ashylyp, 30-qarashaǵa deıin turýy kerek. Al, ata- ana kez kelgen ýaqytta portalǵa kirip, kezekke balasyn tirkeýge quqyly. Ol normatıvtermen bekitilgen norma. Meniń qazir qoldaýymda júrgen 54 kásipker jáne bolashaqta balam tegin bilim alady, tegin oqıdy degen ata- analar zardap shegip otyr», — dedi zańger Nurlan Molbaev.
Al, Jetisýdaǵy jaýapty basshylar munymen kelispeıdi. Aıtýlarynsha úıirmelerge jazylýǵa nıet bildirgen 8 myń balanyń 2 myńy — kezekte turǵandar. Ata-analar ózderi elektrondy kiltpen portalǵa kirip, tirkelýi kerek. Júıeniń jumysynda zań buzýshylyq bolmaǵan.
«Jalpy búgin 9:00-de ashylǵan portal arqyly 9:02–de 2 myń bala tolyp ketti. Ol balanyń kóptiginen dep oılaımyn. Biz ol portaldyń isine aralasa almaımyz» — dedi Jetisý oblystyq halyq shyǵarmashylyǵy ortalyǵynyń bólim basshysy Aslan Sarǵojın.
Aıta keteıik bıyl Jetisý oblysyndaǵy balalarǵa arnalǵan 813 tegin úıirme túrine bıýdjetten 2 mlrd 291 mln qarjy bólingen. Jyl boıy sarylyp kútken tirkeý kózdi ashyp-jumǵansha óte shyqqanyna kúdiktengender endi quzyrly organdarǵa júgingenbekshi.
Eske salaıyq osyǵan deıin Jetisýda aýyl ákimderi múgedekter men kópbalaly analardyń jalaqysynan zańsyz jarna alǵanyn jazǵanbyz.