Taldyqorǵanda bosanǵan áıeldiń ólimine qatysty saraptama júrgizýge maman jetispeıdi
ASTANA. KAZINFORM — Jetisýda bosanǵan áıeldiń ólimine qatysty saraptama maman tapshylyǵyna baılanysty aıaqtalmaı tur, dep habarlaıdy Kazinform tilshisi.
Buqaralyq aqparat quraldarynda Taldyqorǵan qalasynyń 22 jastaǵy turǵyny qaıtys bolǵanyna bir jylǵa jýyq ýaqyt ótse de, onyń otbasyna komıssııalyq sot-medıtsınalyq saraptamanyń qorytyndysy berilmegeni týraly aqparat tarady. Saraptama qajetti mamandardyń bolmaýyna baılanysty toqtatylǵany aıtylǵan.
Jetisý oblysynyń Polıtsııa departamenti áıeldiń ólimine qatysty qylmystyq tergeý júrgizilip jatqanyn rastady. Sot saraptamasy zańda belgilengen tártippen taǵaıyndalǵan. Alaıda tıisti beıindegi medıtsınalyq mamandardyń bolmaýyna baılanysty saraptamany júrgizý qıyndyq týǵyzǵan.
— Qazirgi ýaqytta sot-medıtsınalyq komıssııany qurý jáne saraptamalyq qorytyndy alý úshin qajetti sharalar qabyldanyp jatyr, — dep habarlady vedomstvo.
Áıeldiń 2025 jylǵy 10 jeltoqsanda, qyzyn dúnıege ákelgennen keıin bir aı ótken soń qaıtys bolǵany habarlandy. Osy fakti boıynsha QR Qylmystyq kodeksiniń 317-babynyń 3-bóligimen qylmystyq is tergelip jatyr.
Polıtsııa tergeý barysy Jetisý oblysy Polıtsııa departamenti basshylyǵynyń baqylaýynda ekenin atap ótti. Saraptama qorytyndysy alynǵannan keıin istiń barlyq mán-jaıyna jáne oǵan qatysy bar adamdardyń áreketine quqyqtyq baǵa beriledi.
Buǵan deıin Túrkistan oblysynda júkti áıel men eki balany qaǵyp óltirgen mas júrgizýshi sottalǵanyn jazǵan bolatynbyz.
