Taldyqorǵanda azamattardy qabyldaýǵa arnalǵan ortalyq ashyldy

Taldyqorǵan qalasynda azamattardyń aryz-shaǵymy men ótinishterin qabyldap, tıisti memlekettik organdarmen baılanystyratyn ortalyq jumysyn bastady, dep habarlaıdy Kazinform.

Onda memlekettik organdardyń birinshi basshylaryna jazylýǵa, kez kelgen vedomstvoǵa ótinish berýge, sondaı-aq keńes alýǵa bolady. «Halyq únine qulaq asatyn memleket» tujyrymdamasy aıasynda iske asyrylǵan joba «Halyqpen jumys jónindegi ortalyq memlekettik organdardyń biryńǵaı front-jelisi» bolmaq. 

«Ortalyq elektrondyq-tsıfrlyq qoltańbalar men túrli anyqtamalar bere otyryp, ótinishterdi qabyldaýdyń biryńǵaı terezesi retinde «e-Ótinish» júıesinde ótinishterdi konsýltatsııalaýǵa, jeke qabyldaýlar, qabyldaýlar men tirkeýler júrgizýge mamandanatyn bolady. Munda kún saıyn 9 vedomstvo ókilderi azamattardy qabyldaıdy dep josparlanǵan», - dedi ortalyq basshysy Aıdana Saılaýbekqyzy.

Onyń aıtýynsha, osy maqsatta oblystyq densaýlyq saqtaý, bilim berý, jumyspen qamtýdy úılestirý jáne áleýmettik baǵdarlamalar, jer qatynastary, aýyl sharýashylyǵy, energetıka jáne turǵyn úı-kommýnaldyq sharýashylyq basqarmalary, sondaı-aq Taldyqorǵan qalasy ákimdiginiń turǵyn úı qatynastary, sáýlet jáne qala qurylysy bólimderi sııaqty memlekettik organdardan issaparǵa jiberilgen 20-ǵa jýyq qyzmetker tartylǵan.