Taldyqorǵanda «Aıgólek» balabaqshasynda bolǵan jaǵdaıǵa qatysty tekserý bastaldy
TALDYQORǴAN. KAZINFORM - Ata-analardyń birinen shaǵym túsýine baılanysty Taldyqorǵan qalasyndaǵy balabaqshada tekserý bastaldy. Bul týraly Jetisý oblystyq bilim basqarmasy habarlady.
Áleýmettik jelige taraǵan beınejazbada balabaqsha qyzmetkeriniń búldirshindi jetektep bólmege kirgeni, keıin balanyń ústel astyna tyǵylǵany baıqalady.
Basqarma málimetinshe, quzyrly organ «Aıgólek» balabaqshasynda tergeý jumystaryn bastaǵan. Mekemedegi beınejazbalar túgel qaralyp, ata-analarmen, balabaqsha qyzmetkerlerinen jaýap alynatyny habarlandy.
— Qazirgi tańda bala ata-anasymen birge úıde. Bar derekterge sáıkes, onyń jaǵdaıy turaqty, densaýlyǵyna qaýip tónip turǵan joq. Biz bul jaǵdaıdy qadaǵalaýdy jalǵastyramyz jáne otbasyǵa qajetti qoldaý kórsetýge daıynbyz. Balalardyń qaýipsizdigi — bizdiń basty basymdyǵymyz. Osyǵan baılanysty, Bilim basqarmasy mektepke deıingi uıymdarda etıkalyq normalardyń saqtalýyn baqylaýdy kúsheıtedi. Biz bul máseleniń ádil ári obektıvti túrde qaralatynyna senimdimiz, - dedi Jetisý oblystyq bilim basqarmasy.
Eske salaıyq osyǵan deıin Taldyqorǵandaǵy beıimdeý ortalyǵynda 7 jasar balanyń denesinen útiktiń izi anyqtalǵanyn jazǵanbyz.