Taldyqorǵanda áıeline kúsh kórsetken qarýly adam ustaldy
ASTANA. KAZINFORM – Taldyqorǵan turǵyny kúıeýimen bolǵan janjaldan keıin bir jasar balasymen birge daǵdarys ortalyǵyna ornalastyryldy. Er adam ustalyp, odan pnevmatıkalyq qarý tárkilendi.
Jetisý oblysy Polıtsııa departamentiniń málimetinshe, 2 qazanda Taldyqorǵan turǵyny polıtsııaǵa júgingen. Ol kúıeýiniń denesine jaraqat salǵanyn jáne ózine qaýip tóndirgenin aıtqan. Polıtsııa qyzmetkerleri dereý oqıǵa ornyna baryp, er adamdy ustady. Odan pnevmatıkalyq qarý tárkilendi.
– Dene jaraqatyn salý jáne qorqytý faktileri boıynsha qylmystyq is qozǵaldy. Kúdikti ýaqytsha ustaý ızolıatoryna qamaldy, – dep habarlady polıtsııa.
Dárigerler teksergennen keıin áıel bir jasar balasymen birge daǵdarys ortalyǵyna ornalastyryldy. Onda olarǵa qajetti kómek kórsetildi. Quqyq qorǵaý organynyń málimetinshe, buǵan deıin bul áıelden polıtsııaǵa eshqandaı aryz túspegen.
Oqıǵanyń egjeı-tegjeıi áleýmettik jelide vıdeo jarııalanǵannan keıin belgili boldy. Kadrlar, boljam boıynsha, jeke úıdiń aýlasynda túsirilgen. Vıdeoda jartylaı jalańash er adamnyń áıeldi qýyp júrgeni kórinedi.
Áıeldiń jaqyn qurbysynyń aıtýynsha, bul janjal 2 qazanǵa qaraǵan túni bolǵan. Onyń sózinshe, janjal turmystyq jaǵdaıdan – bir jasar balanyń er adamǵa uıyqtaýǵa múmkindik bermeýinen bastalǵan. Alaıda onyń aıtýynsha, janjal tez arada kúsh kórsetýge ulasqan.
Áıeldiń aıtýynsha, kúıeýi ony tańǵy saǵat 4-ke deıin urǵan. Onyń aıqaıyn kórshileri estip, áıelge kómektesýge tyrysqanda, er adam, olarǵa sýyq qarý kezengen.
Áıeldiń aıtýynsha, tańerteń janjal qaıta jalǵasyp, kúıeýi oǵan taǵy da kúsh kórsetip, dene jaraqatyn salǵan. Osydan keıin ol polıtsııaǵa júgingen.
Qazirgi ýaqytta er adam ustalyp, ýaqytsha ustaý ızolıatorynda otyr. Oqıǵanyń mán-jaıy qylmystyq tergeý aıasynda anyqtalyp jatyr.
Osyǵan deıin Astanada áıeldi burynǵy kúıeýi pyshaqtap óltirgeni týraly jazdyq.
