Taldyqorǵanda avtobýsqa ornatylǵan beınekamera tártip buzǵan kólikterdi túsirip alady
TALDYQORǴAN. KAZINFORM — Ótken aıda Taldyqorǵan qalasyndaǵy qoǵamdyq kólikterdiń birine baqylaý beınekamerasy ornatyldy. Avtobýs ishine qoıylǵan kamera jol erejesin buzǵan kólikterdi tirkeıdi.
«Orakýl ınsaıt» dep atalatyn jańa qurylǵy qala boıynsha № 5 avtobýstyń birine ýaqytsha ornatylǵan.
Ol qala ishinde jyldamdyqty asyrǵandardy, qarsy baǵytqa shyqqandardy, tyıym salynǵan jerge toqtaǵandar men memlekettik tirkeý nómirinsiz júrgenderdi nysanasyna alyp, jınalǵan aqparattardy avtomatty túrde polıtsııanyń arnaıy ortalyǵyna jiberip otyrady.
Osy arqyly tártip saqshylary kólik ıelerine aıyppul joldaıdy. Aldaǵy ýaqytta qoǵamdyq kólikten bólek, jedel járdemge de ornatý josparda bar eken.
— 10 qazannan bastap jol qaýipsizdigin qamtamassyz etý úshin qoǵamdyq kólikke beınekamera qoıyldy. Qazirgi ýaqytta pılottyq rejımde istep jatyr. Sáıkestendiretin, ózin dáleldendiretin qaǵaz sertıfıkaty bolǵan ýaqyttan bastap biz ony iske asyra alamyz. Bul qazir jıilep ketken jol apattarynyń aldyn alý úshin, júrgizýshilerdiń kólik júrgizý mádenıetin jaqsartý maqsatynda jasalyp jatqan joba, — deıdi Jetisý oblystyq polıtsııa departamenti basqarmasynyń aǵa ınspektory Erkebulan Dosymbekov.
Beınekamera 1 aıǵa jýyq ýaqytta jyldamdyqty asyrý boıynsha ǵana 611 zańbuzýshylyqty anyqtap, 12 mln teńgeden astam aıyppul tirkegen.
Aıta keteıik qurylǵy 6 qarashaǵa deıin pılottyq rejımde jumys istegendikten bul soma ereje buzǵan júrgizýshilerden óndirilmeıdi.
Polıtsııa qyzmetkerleri bul jobanyń naqty qaı ýaqytta júzege asatynyn ashyp aıtpady.
Eske salaıyq buǵan deıin Tekeli qalasynda avtobýs júrgizýshileriniń jumyssyz qalǵanyn jazǵanbyz.
