Taldyqorǵanda aýrýhanaǵa jatýdan bas tartqan 23 jastaǵy sportshy qaıtys boldy
TALDYQORǴAN. KAZINFORM — Taldyqorǵanda 23 jastaǵy sportshy Aıan Turdybektiń ólimine qatysty mán-jaılar tekserilip jatyr.
Marqumnyń qurbysy Gúlim Bekturǵanovanyń sózinshe, sportshy ózin jaısyz sezingen sátte jedel járdem shaqyrylǵan. Kelgen brıgada naýqasty tekserip, tamaǵyn qabynǵanyn baıqaǵan. Oǵan dene qyzýyn túsiretin dári ishýdi usynyp, ketip qalǵan.
Keıinirek jaǵdaıy odan saıyn qıyndaǵan boıjetkendi jaqyndary aýrýhanaǵa ózderi aparǵan. Alaıda týystarynyń aıtýynsha kópbeıindi aýrýhanada Aıannyń tirkeýi joq degen syltaýmen qabyldamaı, oblystyq aýrýhanaǵa jibergen.
Ondaǵy dárigerler naýqastyń jaǵdaıyn «ınfektsııalyq» dep baǵalap, ınfektsııalyq aýrýhanaǵa baǵyttaǵan. Medıtsınalyq mekemede boıjetkenge eki tamshylatqysh qoıylǵan. Qurbysynyń aıtýynsha, basynda jaǵdaıy jaqsarǵandaı kóringenimen, keıin óńi bozaryp, erinderi kógerip ketken.
Sondaı-aq naýqastyń ári qaraı aýrýhanada qalýdan bas tartyp, óz qolymen qolhat jazǵany habarlandy. Biraq sol túni onyń jaǵdaıy kúrt nasharlap, taǵy da jedel járdem shaqyrylǵan. Ol oblystyq aýrýhanaǵa shuǵyl jetkizgenimen, esin jımastan kóz jumdy.
Resmı jaýap
Týystary Aıan Turdybekke medıtsınalyq kómek der kezinde kórsetilmegenin jáne medıtsına qyzmetkerleri tarapynan salǵyrttyq bolýy múmkin ekenin aıtady. Sonymen qatar olar ólim týraly qorytyndyda «belgisiz zattan ýlaný» dep kórsetilgenin atap ótti.
Jetisý oblysynyń densaýlyq saqtaý basqarmasy 9 sáýir kúni saǵat 18:16–da Aıan Turdybekke aldyn ala «jiti respıratorlyq vırýstyq ınfektsııa» (JRVI) dıagnozy qoıylyp, em taǵaıyndalǵanyn habarlady.
— Keıinirek naýqas oblystyq ınfektsııalyq aýrýhanaǵa óz betimen júgingen, onda oǵan qajetti medıtsınalyq kómek kórsetilip, statsıonarǵa jatý usynylǵan. Alaıda ol emdelýden bas tartyp, tıisti qujatqa qol qoıǵan, — dedi oblystyq densaýlyq saqtaý basqarmasy basshysynyń orynbasary Almagúl Kenjeǵulova.
Onyń aıtýynsha, saǵat 03:49–da jedel járdemge qaıta shaqyrtý túsken. Dárigerler shuǵyl kómek kórsetip, naýqasty oblystyq aýrýhanaǵa jetkizse de, qutqara almaǵan.
Tergeý barysy
Polıtsııa málimetinshe, qazirgi ýaqytta 23 jastaǵy boıjetkennńń ólimi boıynsha sotqa deıingi tergeý amaldary júrip jatyr.
— Qazirgi ýaqytta quzyrly organdar tekserý júrgizip ıýstyr, sondaı-aq sot-medıtsınalyq saraptama taǵaıyndaldy. Tekserý qorytyndysy boıynsha qosymsha aqparat beriledi, — dedi Almagúl Kenjeǵulova.
Óńirdiń sport basqarmasy Aıan Turdybektiń kózi tirisinde kúrespen aınalysqanyn jáne sambodan aımaqtyq jarystarda óner kórsetkenin málimdedi.
Eske salaıyq, Shymkentte dárihanalardaǵy egý bólmelerinde 4 adam qaıtys bolǵan.
