Taldyqorǵanda áskerı qyzmetshiler 102 jasqa tolǵan maıdangerdi quttyqtady

TALDYQORǴAN. KAZINFORM – Taldyqorǵanda Jetisý garnızonynyń áskerı qyzmetshileri, Qarýly kúshterdiń ardagerleri men «Jas sarbaz» áskerı-patrıottyq qozǵalysynyń tárbıelenýshileri soǵys ardageri Ysqaq Ábilpeıisuly Qusaıynovty 102 jasqa tolǵan týǵan kúnimen quttyqtady.

Olar ardagerge Qorǵanys mınıstriniń quttyqtaý hatyn tabystap, estelik syılyqtar men gúl shoqtaryn usynyp, erekshe qurmet pen izgi tilekterin jetkizdi. Merekelik dastarqan basynda aqsaqal ózine kórsetilgen qurmet pen yqylasqa rızashylyǵyn bildirip, barshaǵa beıbit ómir, molshylyq pen bereke tilep, aq batasyn berdi.

Ysqaq Ábilpeıisuly Qusaıynov 1924 jylǵy 14 qańtarda Jetisý oblysynyń Alakól aýdanyna qarasty Kólbaı aýylynda dúnıege kelgen. 1942 jyly áskerge shaqyrylyp, Qıyr Shyǵys maıdanynyń Amýr áskerı flotılııasy quramynda qyzmet etti. Aqsaqal erligi men eńbektegi qajyr-qaıraty úshin ІІ dárejeli Otan soǵysy, «Eńbek Qyzyl Tý» ordenderimen, «Tynyq muhıty flotynyń ardageri», «Jýkov», «Eren eńbegi úshin» medaldarymen jáne «Áskerı-teńiz flotynyń úzdigi» tósbelgisimen marapattalǵan.

1947 jyly ásker qatarynan bosatylǵan Ysqaq Qusaıynov pedagogıkalyq ýchılışeni támamdap, ustazdyq qyzmet atqardy. Ol shaǵyn quramdy mektepterdiń bastaýysh synyp oqýshylaryn oqytý ádistemesine arnalǵan oqý quralyn ázirlep, ony jaryqqa shyǵardy. Jubaıy Bákish Azbekqyzymen birge eki qyz tárbıelep ósirip, olardan nemere, shóbere, shópshek súıip otyr.

Budan buryn Almatyda áskerı qyzmetshiler 103 jasqa tolǵan maıdangerdi týǵan kúnimen quttyqtaǵanyn jazǵan edik.