Taldyqorǵanda áskerı bólimge Keńes Odaǵynyń eki márte Batyry Sergeı Lýganskııdiń esimi berildi
TALDYQORǴAN.KAZINFORM — Aldymen batyrdyń bıýsti ashylyp, aldyna gúl shoqtary qoıyldy. Saltanatty sharaǵa Qorǵanys mınıstri Rýslan Jaqsylyqov, tuńǵysh qazaq ǵaryshkeri, Keńes Odaǵynyń Batyry, Halyq qaharmany Toqtar Áýbákirov jáne qazaqstandyq ǵaryshker Aıdyn Aıymbetov qatysty.
Jınalǵandardy quttyqtaǵan Qorǵanys mınıstri Rýslan Jaqsylyqov Taldyqorǵandaǵy osy avıabazaǵa Sergeı Lýganskııdiń esimin berý jóninde el Prezıdenti bıyl Atyraý qalasynda ótken Ulttyq quryltaıdyń ІІІ otyrysynda bastama kótergenin, sondaı-aq bul usynysqa Qarýly Kúshterdiń jeke quramy qoldaý bildirgenin atap ótti. Áskerı qyzmetshilerdiń kúrdeli de jaýapty qyzmetterine tabys tiledi.
Keńes Odaǵynyń Batyry, Halyq qaharmany Toqtar Áýbákirov jýrnalısterge bergen suhbatynda Sý-30 ushaǵymen osy Taldyqorǵan avıabazasynan ushqan kezderin eske alyp, turǵyndardy Jeńis kúnimen quttyqtady.
«Búgin aıtýly oqıǵa — Taldyqorǵan avıabazasyna eki márte Keńes Odaǵynyń Batyry Sergeı Danılovıch Lýganskııdiń esimi berildi. Ol — aty ańyzǵa aınalǵan adam. Bala kezimde men ony ózime ustaz tuttym, sonyń úlgisimen tárbıelendim. Avıabazaǵa dańqty batyrdyń esimin berýdiń patrıottyq, tárbıelik mańyzdy zor. Sonymen qatar bul bolashaqta osynda qyzmet etetin jas ushqyshtarǵa da, qazir ushatyndarǵa da eki ese jaýapkershilik júkteıdi. Óńir turǵyndaryn Jeńis kúni merekesimen taǵy da quttyqtaımyn», — dedi, Toqtar Ońǵarbaıuly.
Shara sońynda kópshilikke merekelik kontsert usynyldy.
