Taldyqorǵanda asfalttyń sapasyna qatysty vıdeo tarady: ákimdik jaýap berdi
ASTANA. KAZINFORM — Áleýmettik jelide Taldyqorǵanda túsirilgen vıdeo qyzý talqylanyp jatyr. Kadrdan jańadan tóselgen asfalttyń kúrekpen ońaı alynyp jatqanyn kórýge bolady. Bul jaǵdaı jeli qoldanýshylarynyń narazylyǵyn týdyryp, jol jumystarynyń sapasyna qatysty kúmán týǵyzdy.
Taldyqorǵan ákimdiginiń málimetinshe, vıdeoda kórsetilgen jol bóligi sol kezde tapsyrys berýshi tarapynan áli qabyldanbaǵan. Qalalyq jolaýshylar kóligi jáne avtomobıl joldary bóliminiń basshysy Erlan Nıetbaev vıdeo anyqtalǵan kemshilikterdi túzetý jumystary kezinde túsirilgenin aıtty.
Onyń sózinshe, merdiger kompanııa talapqa saı emes asfaltty óz qarajatyna alyp tastap, joldy qaıta tóseıdi. Jumystyń oryndalýyn qalalyq bólim baqylap otyr.
— Bul jol jabyny qabyldanǵan joq. Merdiger bul ýchaskedegi asfaltty óz qarajatyna alyp tastap, jumysty qaıta júrgizedi, — dedi Erlan Nıetbaev.
Osylaısha, áleýmettik jelide taraǵan vıdeodaǵy jol bóligi áli paıdalanýǵa qabyldanbaǵan. Qazir ondaǵy kemshilikterdi joıý jumystary júrgizilip jatyr.
Aıta keteıik, buǵan deıin Túrkistan oblysynda talapqa sáıkes kelmegen materıaldar qoldanylǵan jol ýchaskelerindegi asfalt jabyny merdigerlerdiń óz qarajaty esebinen qaıta tóselgeni habarlandy.
