Taldyqorǵanda áleýmettik osal toptaǵy 51 otbasy baspanaly boldy
TALDYQORǴAN. KAZINFORM – Taldyqorǵanda kezekte turǵan 51 otbasy jańa baspananyń kiltine ıe boldy. Jańa qonys ıelerin Jetisý oblysynyń ákimi Beıbit Isabaev quttyqtady, - dep habarlaıdy Jetisý oblysy ákiminiń baspasóz qyzmeti.
Óńir basshysy azamattardy qoljetimdi turǵyn úımen qamtamasyz etý halyqtyń ómir súrý sapasy men áleýmettik ál-aýqatyn arttyrýǵa baǵyttalǵan memlekettik saıasattyń basym baǵyttarynyń biri ekenin atap ótti.
– Memleket basshysynyń tapsyrmasy aıasynda óńirde turǵyn úı qurylysynyń qarqyny jyldan jylǵa artyp keledi. Máselen, jyl basynan beri Taldyqorǵan qalasynyń ózinde 49 myń sharshy metr turǵyn úı paıdalanýǵa berildi. ıAǵnı ótken jyldyń sáıkes kezeńimen salystyrǵanda 3,4 paıyzǵa artqan. Jyl sońyna deıin kezeń-kezeńimen Taldyqorǵannyń 1400-den astam otbasyn qoljetimdi baspanamen qamtamasyz etýdi josparlap otyrmyz, – dedi Beıbit Isabaev.
Jańa baspana kezekte turǵan azamattarǵa memlekettik qoldaý sharalary aıasynda berildi. Olardyń arasynda kópbalaly jáne tolyq emes otbasylar, jetim balalar men ata-anasynyń qamqorlyǵynsyz qalǵan balalar, І jáne ІІ toptaǵy múgedektigi bar azamattar bar.
Jańa qonys ıeleriniń biri Dınara Otarbaeva turǵyn úı kezeginde 9 jylǵa jýyq turǵanyn aıtty.
– Búgin otbasymyz úshin úlken qýanysh. Jańa qonysqa ıe bolyp jatyrmyz. «Jastar-3» shaǵyn aýdanyndaǵy jańa úıimizdiń kiltin qolymyzǵa aldyq. Turǵyn úı kezeginde 9 jylǵa jýyq turdym. Alty bala tárbıelep otyrmyn, onyń beseýi mektep oqýshylary, – dedi ol.
Al Dana Jamanaeva 2017 jyldan beri baspana kezeginde turǵan.
– Qýanyshymdy sózben aıtyp jetkize almaımyn. Eń aldymen balalarymdy ertip aparyp, ózderiniń jeke úılerin kórsetemin. Endi olardyń óz bólmeleri bolady, keń ári jaıly jerde turatyn boldyq. Osy ýaqytqa deıin talaı jyl páter jaldap turdyq. Endi, mine, óz baspanamyz bar. Kórsetilgen qoldaý úshin shyn júrekten alǵys aıtamyn, – dedi ol.
«Qulager» shaǵyn aýdanynan páter alǵan Torǵyn Toıshybekova turǵyn úı kezeginde 10 jyl turǵanyn jetkizdi.
– Osy ýaqyt ishinde bir jaldamaly páterden ekinshisine kóship, talaı qıyndyqty bastan ótkerdik. Balalarmen birge kóship-qoný, árıne, qıyn boldy. Endi munyń bári artta qaldy. Jas otbasymyzdyń jańa shaǵyn aýdanda óz baspanasy bar dep qýanyp jatyrmyz, – dedi ol.
