Taldyqorǵanda Ábilhan Qasteevke eskertkish qoıyldy
TALDYQORǴAN. KAZINFORM - Búgin Jetisý oblysynyń Taldyqorǵan qalasynda Qazaqstannyń Halyq sýretshisi Ábilhan Qasteevtiń eskertkishi ornatyldy. Sýretshiniń 120 jyldyǵyna oraı qoıylǵan qola músin Kórkemóner galereıasynyń aýlasyna qoıyldy.
Mereıtoılyq sharaǵa Jetisý oblysynyń ákimi Beıbit Isabaev, memleket jáne qoǵam qaıratkeri Myrzataı Joldasbekov, Qazaqstannyń Halyq jazýshysy Beksultan Nurjekeev, Qazaqstan Sýretshiler odaǵynyń basqarma tóraǵasy Ómirbek Jubanııazov pen kórnekti qylqalam sheberiniń qyzy Gúldarııa Qasteeva jáne ózge de zııaly qaýym ókilderi men oblys jurtshylyǵy qatysty.
"Ábilhan Qasteevpen etene aralaspasam da tirisinde kózin kórdim. Qoı aýzynan shóp almaıtyn momyn kisiniń tula boıynda saf talanttyń tunyp jatqany tańqalarlyq. Ol - qazaqtyń rýhyn kótergen, qazaqty álemge tanytqan azamat. Biz mundaı uly óner ıelerin qasterleýimiz kerek. Sonda ǵana berekeli el bolamyz. Ábilhan aǵa eshqashan ólmeıdi, halyqtyń kókeıinde jarqyrap qala beredi" - dedi memleket jáne qoǵam qaıratkeri, Ulttyq ǵylym akademııasynyń akademıgi Myrzataı Joldasbekov.
Eskertkishtiń ashylýynan keıin qonaqtar Kórkemóner galereıasynyń ishinde Á.Qasteevtiń 120 jyldyǵyna arnalǵan ekspozıtsııalyq kórmeni tamashalady. Onda sýretshiniń 9 kartınasynyń tupnusqasy qoıylǵan. Budan ári mereıtoılyq jıyn І. Jansúgirov atyndaǵy Mádenıet saraıynda «Tuǵyry bıik taý tulǵa» atty respýblıkalyq konferentsııamen jalǵasty. Sondaı-aq sahna tórinde mereıtoıǵa arnap shyǵarylǵan qylqalam sheberiniń ómiri men óner jolyna qatysty «Ábilhan Qasteev», «Ómir mektebi» kitaptarynyń tusaýy kesildi.
"Biz kishkentaıymyzdan atamyzdyń barlyq kartınalaryn kórip-bilip óstik. Sonyń ishinde maǵan akvarelmen salǵan taýlardyń kartınasy keremet unaıtyn. Óse kele sýretshilik ónerge bet burdym. Qazir keskindeme, grafıka, ıllıýstratsııa baǵyttarynda jumys jasaımyn. Ábilhan atamyzdyń eńbegi baǵalanyp, halyqtyń qurmetine bólenip jatqany - biz úshin maqtanysh", - deıdi Saýran Qasteev.
Jetisý oblysy ákiminiń baspasóz qyzmetiniń málimetinshe erteń Qasteevtiń týǵan jeri Panfılov aýdany Shejin aýylynda sýretshilerdiń respýblıkalyq pleneri bastalady. Oǵan elimizdiń 20-ǵa jýyq kásibı sýretshisi qatysady. Plener 10 qazanǵa deıin jalǵasyp, shara Jarkent qalasyndaǵy Kórkemóner galereıasynda qatysýshylardyń eńbekteriniń kórmesimen qorytyndylanady.
Eske sala keteıik, buǵan deıin Taldyqorǵanda 20 jastaǵy jigitti júk kóligi basyp ketkeni týraly jazǵanbyz.
