Taldyqorǵanda 8,7 shaqyrym jylý magıstrali qaıta jańǵyrtylyp jatyr
ASTANA. KAZINFORM — Aldaǵy jylytý maýsymyna daıyndyq aıasynda Taldyqorǵan qalasynda jylýmen jabdyqtaý nysandaryn jańǵyrtý jumystary júrgizilip jatyr. Bul týraly Energetıka mınıstrligi málim etti.
2026–2029 jyldarǵa arnalǵan kommýnaldyq jáne energetıkalyq sektorlardy jańǵyrtý jónindegi ulttyq jobany iske asyrý aıasynda oblys ortalyǵynda ınjenerlik ınfraqurylymnyń tozýyn tómendetýge jáne tutynýshylardy jylýmen jabdyqtaýdyń senimdiligin arttyrýǵa baǵyttalǵan magıstraldyq jylý jelilerin qaıta jańǵyrtý kózdelgen.
Onyń aıasynda 1980 jyly paıdalanýǵa berilgen jáne tozý deńgeıi 61%-dy quraıtyn dıametri 700 mm jylý magıstralin rekonstrýktsııalaý júrgiziledi.
Joba 2029 jylǵa deıin úsh kezeńmen iske asyrylady. Qaıta jańǵyrtylatyn ýchaskelerdiń jalpy uzyndyǵy — 8,7 km. Jumystar tolyq aıaqtalǵannan keıin tozý deńgeıi 38%-ǵa deıin tómendeıdi.
— Bıyl «Taldyqorǵan qalasynyń magıstraldyq jylý jelilerin qaıta jańǵyrtý» jobasynyń birinshi kezeńi júzege asyrylýda. Onyń uzyndyǵy 3,5 km. Búgingi kúni 800 metr jumys oryndalyp, jospardyń 25%-y iske asyryldy, — delingen habarlamada.
Birinshi kezeńniń qorytyndysy boıynsha jylý magıstraliniń tozý deńgeıi qazirgi kórsetkishten 51,8%-ǵa deıin tómendeıdi. Bul jylýmen jabdyqtaýdyń senimdiligin arttyryp, jylytý kezeńinde apattyq jaǵdaılardyń týyndaý qaýpin azaıtýǵa múmkindik beredi.
Jobany iske asyrý nátıjesinde paıdalaný shyǵyndaryn azaıtý, jylý energııasynyń shyǵyndaryn tómendetý jáne qalanyń jylýmen jabdyqtaý júıesiniń tıimdiligin arttyrý kútiledi.
— Taldyqorǵandaǵy jumystar eldiń barlyq aımaqtaryn qamtıtyn jylýmen jabdyqtaý ınfraqurylymyn jańǵyrtý baǵdarlamasynyń bir bóligi. Aǵymdaǵy jyly aldaǵy jylytý maýsymyna daıyndyq aıasynda elimiz boıynsha jylý jelileriniń 377 shaqyrymyn qaıta jańǵyrtý jáne kúrdeli jóndeý josparlanǵan, onyń ishinde 130 shaqyrymy — Ulttyq joba aıasynda. Qazirgi ýaqytta jumystar 16 óńirde 152 shaqyrym boıynda júrgizilýde, onyń 35 shaqyrymy aıaqtaldy, — delingen vedomstvonyń habarlamasynda.
Qazaqstan Respýblıkasy Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń aýmaqtyq departamentteri aldaǵy jylytý maýsymyna jylýmen jabdyqtaý nysandarynyń daıyndyq barysyna, jóndeý jumystarynyń kestege sáıkes oryndalýyna turaqty monıtorıng júrgizedi.
Aıta keteıik, búgin túnde Taldyqorǵan qalasynda aýa sapasy nasharlaıdy.
